- વડોદરા નજીક બાજવા ગામનો લેબર કોન્ટ્રાક્ટર ભેદી સંજોગોમાં ગુમ
- સિંધરોટ પોલીસ ચોકી પાસેથી કાર અને મોબાઈલ મળી આવ્યો
- પત્તો નહીં લાગતાં પરિવારજનોએ તાલુકા પોલીસ મથકે ફરિયાદ નોંધાવી
- "કામ માટે બહાર જઉં છું" કહી ઘરેથી નીકળેલો કોન્ટ્રાક્ટર પરત જ ન આવ્યો
વડોદરાના બાજવા ગામનો લેબર કોન્ટ્રાક્ટર બે દિવસથી ગુમ, અપહરણની આશંકા
વડોદરાઃ વડોદરા નજીક બાજવા ગામનો લેબર કોન્ટ્રાક્ટર બે દિવસ અગાઉ રહસ્યમય સંજોગોમાં ગુમ થયો હતો. હાલ તેની કાર અને મોબાઈલ સિંધરોટ પોલીસ ચોકી પાસેથી મળી આવ્યા છે. આ અંગે પરિવારજનોની ફરિયાદને આધારે તાલુકા પોલીસે વધુ તપાસ હાથ ધરી છે.
વડોદરાના બાજવા ગામનો લેબર કોન્ટ્રાક્ટર બે દિવસથી ગુમ, અપહરણની આશંકા ગત તારીખ 18ના રોજ ઘરેથી પોતાની કાર લઈને નીકળ્યા બાદ ગુમ થયોબાજવામાં પરિવાર સાથે રહેતો યુવાન સિવિલ કોન્ટ્રાક્ટર ગત શુક્રવારની મોડી સાંજે તેની કારને સિંધરોટ રોડ પર પોલીસ ચોકી પાસે પાર્ક કર્યા બાદ ભેદી સંજોગોમાં ગુમ થતા ચકચાર મચી છે. યુવકની લાલ રંગની કારમાં આવેલા ચાર ઈસમો અપહરણ કરીને લઈ ગયાની વાત વહેતી થતા તાલુકા પોલીસે યુવકની ગુમ થવાની અરજીના આધારે તેની શોધખોળ શરૂ કરી છે. જોકે, બે દિવસ બાદ પણ યુવકનો કોઈ પત્તો ન લાગતા પરિવારજનોમાં કંઈક અઘટિત થયાની શંકાએ ચિંતાનું મોજુ ફરી વળ્યું છે.
ગુમ થયેલો કોન્ટ્રાક્ટર અકોટા, ગોત્રી, સવિતા ફાર્મ અને નંદેસરી જીઆઈડીસીમાં કામ કરે છે
બાજવા વિસ્તારના પરબીડિયા ફળિયામાં માતાપિતા, પત્ની અને બે પુત્રી સહિતના પરિવાર સાથે રહેતો 38 વર્ષીય લલિત જગન્નાથ પરમાર તેના ભાગીદાર ભદ્રેશ સાથે મકાન બાંધકામ અને લેબર સપ્લાયનો કોન્ટ્રાક્ટનો વ્યવસાય કરે છે. આ બંને ભાગીદારોના હાલમાં નંદેસરી જીઆઈડીસી તેમ જ વડોદરા શહેરમાં ચાર સ્થળોએ કામ ચાલી રહ્યા છે. 18 ડિસેમ્બરે સાંજે લલિત પરિવારજનોને કામ માટે બહાર જઉ છું તેમ કહીને તેની કાર લઈને નીકળ્યો હતો.
ફોન ન લાગતા તેઓએ તેની શોધખોળ શરૂ
જોકે, મોડી રાત સુધી તે પરત ન ફરતા પરિવારજનો અને ભાગીદારે તેનો ફોન કર્યા હતા, પરંતું ફોન ન લાગતા તેઓએ તેની શોધખોળ શરૂ કરી હતી. આ દરમિયાન તેઓને જાણ થઈ હતી કે, લલિતની કાર સિંધરોટ રોડ પર આવેલી પોલીસ ચોકી પાસે બિનવારસી હાલતમાં પડેલી છે. આ વિગતોના પગલે તેઓએ તરત સિંધરોટ ચોકી પાસે તપાસ કરી હતી, જેમાં તેનો મોબાઈલ ફોન કારમાં હોવાની જાણ થઈ હતી. આ બનાવની જગન્નાથભાઈએ તાલુકા પોલીસ મથકમાં પોતાના પુત્રના ગુમ થવાની અરજી કરતા પોલીસે લલિતનો ફોન કબજે કરી તેના કોલ ડિટેઈલ્સના આધારે તપાસ શરૂ કરી છે. જોકે, પોલીસ ચોપડે લલિત ભેદી સંજોગોમાં ગુમ થયાની નોંધ કરાઈ છે.
