વડોદરાઃ વન વિભાગની ટીમે બાતમીને વડોદરા સુરત હાઈવે પર આવેલ L & T કંપની પાસે છટકું ગોઠવી એક કારમાંથી સર્પ જીવ આંધળી ચાકરણનું 42 લાખમાં વેચાણ કરવા નીકળેલા 5 ઈસમોને ઝડપી પાડી કાયદેસરની કાર્યવાહી હાથ ધરી હતી.
આ અંગે માહિતી આપતા વડોદરા વનવિભાગના RFO નિધિબેન દવેએ જણાવ્યું હતું કે, GSPCA સંસ્થા પાસેથી બાતમી મળી હતી કે, આ સાપનું ગેરકાયદેસર વેચાણ કરવામાં આવી રહ્યું છે. જેના આધારે વન વિભાગની ટીમે વડોદરા સુરત હાઈવે પર આવેલી L & T કંપની પાસે છટકુ ગોઠવ્યું હતું.
જેમાં આંધળી ચાકણ (કોમન સેન્ડ બોઆ) પ્રજાતીના સર્પજીવ નંગ -1નું વેચાણ કરવા નીકળેલા 3 ઈસમો સહિત કુલ 5 ઈસમોને ઝડપી પાડ્યા હતા. આ સાપને શીડયુલ -4 હેઠળ રક્ષણ આપવામાં આવ્યું છે. અત્રે ઉલ્લેખનીય છે કે, બે તરફના મોઢાવાળા સાપ તરીકે પ્રખ્યાત આંધળી ચાકણ તરીકે ઓળખાતા સાપમાં મેડીસીનલ ગુણ હોય છે. આ ઉપરાંત સાપ રાખવાથી ધનલાભ થતો હોવાની અંધશ્રદ્ઘાને કારણે તેનો વેપાર અને વેચાણ થતું હોય છે. તેમજ તાંત્રિક વિધી માટે પણ આ સાપને લાખોમાં વેચવામાં આવે છે.