- વાહન ચાલકોને પડી રહી છે મુશ્કેલી
- બારડોલી હિલસ્ટેશનમાં ફેરવાયું
- કમોસમી વરસાદ બાદ કેરી પકવતા ખેડૂતોને વધુ એક માર
બારડોલી: સુરત જિલ્લામાં આજે સવારથી જ ધુમ્મસભર્યા વાતાવરણને કારણે વિઝીબિલિટી ઓછી થઈ જવાથી વાહન ચાલકોને હાલાકી વેઠવી પડી હતી. ગત અઠવાડિયે કમોસમી વરસાદ પડ્યા બાદ ધુમ્મસ વધતા બારડોલી શહેર જાણે હિલ સ્ટેશનમાં ફેરવાય ગયું હોય એવો લોકોને અનુભવ થયો હતો.
બારડોલીમાં ગાઢ ધુમ્મસથી વિઝીબિલિટી ઓછી થઈ ગત અઠવાડિયે વાતાવરણમાં અચાનક પલટો આવ્યા બાદ કમોસમી વરસાદને કારણે ભર શિયાળામાં ચોમાસા જેવી સ્થિતિ સર્જાઈ હતી. આ દરમિયાન આજે મંગળવારે વહેલી સવારથી જ ઠંડા પવન સાથે બારડોલી સહિત જિલ્લાભરમાં ગાઢ ધુમ્મસ છવાયેલું રહ્યું હતું. મોડે સુધી ગાઢ ધુમ્મસને કારણે દૂરનું દેખાવું પણ મુશ્કેલ બની ગયું હતું.
વાહન ચાલકોને હેડલાઈટ ચાલુ રાખવી પડી ખાસ કરીને હાઇવે પર વાહન ચાલકોને વધુ હાલાકીનો સામનો કરવો પડ્યો હતો. હાઇવે પર ધુમ્મસને કારણે દેખાય શકતું ન હોવાથી વાહન ચાલકોએ હેડલાઈટ ચાલુ રાખી ધીમી ગતિએ વાહન ચલાવવાની ફરજ પડી હતી.
આમ્રમંજરીને નુકસાનની ભીતિ
બીજી તરફ કમોસમી વરસાદનો માર ઝીલી ચૂકેલા કેરી પકવતા ખેડૂતોની પણ ચિંતા વધી ગઈ હતી. વરસાદથી થયેલા નુકસાન બાદ હવે ધુમ્મસને કારણે પણ આમ્રમંજરી કાળી પડી જવાની ભીતિ ખેડૂતોમાં સેવાઇ રહી છે.
