દિલ્હી ચૂંટણી બાદ ગુજરાતમાં સંગઠન રચના કરાશે : ભરતસિંહ પરમાર

ગુજરાતમાં સંગઠન પર્વને લઇને 3 મહિના થઈ ગયા છે. તેમ છતાં શહેર જિલ્લાના પ્રમુખ સહિત સંગઠનના પદાધિકારીઓની જાહેરાત અત્યાર સુધી કરવામાં આવી નથી. જેને લઇ અનેક તર્ક-વિતર્કો ચાલી રહ્યા છે. ત્યારે આ વિલંબ અંગે પ્રદેશ ભાજપ મહામંત્રી ભરતસિંહ પરમારે સુરતમાં જણાવ્યું હતું કે, દિલ્હી ચૂંટણી બાદ તમામ પદો માટે વરણી થઇ જશે. જેને લઈ લોકોને ચિંતા કરવાની જરૂર નથી.

સુરત : મહાનગરમાં CAA કાયદાના સમર્થનમાં વિશાળ રેલીનું ભારતીય જનતા પાર્ટી દ્વારા આયોજન કરવામાં આવશે. આ અંગે પ્રદેશ મહામંત્રી ભરતસિંહ પરમારે જણાવ્યું હતું કે, 9 ફેબ્રુઆરીના રોજ સુરત શહેર અને જિલ્લા ઉપક્રમે રેલી નીકળશે. તેમજ વરાછા સરદાર પટેલ પ્રતિમાને પુષ્પ હાર અર્પણ કરી આ રેલી યોજવામાં આવશે. જેમાં મીની બઝારથી હીરા બાગ સુધી 2 કિલોમીટરની આ રેલી હશે.

વધુમાં ભરતસિંહ પરમારે જણાવ્યું હતું કે, CAA માનવતા પૂર્ણ કાયદો છે. જેને લઈ જે ભ્રમ ફેલાવવામાં આવી રહ્યું છે. તેને જડબાતોડ જવાબ મળે. એ માટે આ મહારેલીનું આયોજન કરવામાં આવ્યું હતું. જેમાં NGO તેમજ અન્ય સંસ્થાઓ અને દેશભક્તો જોડાશે. આ રેલીમાં મુખ્ય પ્રધાન વિજય રૂપાણી પણ જોડાઈ શકે છે.

જો કે, મહેસૂલ મંત્રી કૌશિકભાઈ પટેલ હાજરી આપશે. આ રેલીમાં હજારોની સંખ્યામાં લોકો જોડાશે. એવું પરમારે જણાવ્યું હતું.