આઇસરમાં ચોર ખાનું બનાવી અમદાવાદ લઈ જવાતા વિદેશી દારૂ સાથે બે ઝડપાયા

પલસાણા પોલીસે નેશનલ હાઇવે પરથી વિદેશી દારૂ ભરેલો એક ટેમ્પો સાથે ચાલક અને ક્લીનરને પકડી પાડ્યા હતા. આ ટેમ્પોની પાછળ ખાના બનાવી તેમાં દારૂ છુપાવ્યો હતો. પોલીસે ટેમ્પોમાંથી રૂ. 3.20 લાખ રૂપિયાના વિદેશી દારૂ સાથે કુલ 5.31 લાખનો મુદ્દામાલ કબ્જે કર્યો હતો.

• 3.20 લાખ રૂપિયાના વિદેશી દારૂ સાથે કુલ 5.31 લાખનો મુદ્દામાલ કબ્જે
• પોલીસે પીછો કરી ટેમ્પો ઝડપી પાડ્યો
• નાસીકથી લઈ અમદાવાદ પહોંચાડાઈ રહ્યો હતો દારૂ
  

સુરત: સ્થાનિક સ્વરાજની ચૂંટણી નજીક આવતા જ વિદેશી દારૂની હેરાફેરીમાં વધારો થઈ રહ્યો છે. બુટલેગરો દ્વારા દારૂની હેરાફેરી માટેમાટે બુટલેગરો અવનવી તરકીબો અજમાવી રહ્યા છે. સુરતનાં બારડોલી નજીક પલસાણા પોલીસે ટેમ્પામાં ચોરખાનું બનાવીને કરવામાં આવતી દારૂની હેરાફેરીને ઝડપી પાડી છે. પલસાણા ખાતે ને.હા.નં-48 ઉપર પોલીસે એક ટેમ્પોને અટકાવવાની કોશિશ કરી હતી. પરંતુ ચાલક ટેમ્પો પૂરઝડપે હંકારી જતાં પોલીસે તેનો પીછો કર્યો હતો અને ઊંભેળ ગામ નજીક ટેમ્પો ઝડપી પાડ્યો હતો. ટેમ્પોની તલાશી લેતા પાછળના ભાગે ચોરખાનામાંથી 3.20 લાખના દારૂ મળી આવ્યો હતો. પોલીસે ચાલક અને ક્લીનરને ઝડપી પાડ્યા હતા જ્યારે એકને વોન્ટેડ જાહેર કર્યો હતો.

પોલીસે બાતમીના આધારે વોચ ગોઠવી હતી

પલસાણા પોલીસની ટીમને બાતમી મળી હતી કે, નવસારી તરફથી એક સફેદ કલરનો ટાટા એસ કંપનીનો ટેમ્પો પલસાણા તરફ આવી રહ્યો છે અને આ ટેમ્પામાં વિદેશી દારૂનો જથ્થો ભરેલ છે. જે હકીકતના આધારે પલસાણા પોલીસે પલસાણા ખાતે મુંબઈથી અમદાવાદ જતાં ને.હા.નં-48 ઉપર વોચ ગોઠવી હતી.

વિદેશી દારૂ

ટેમ્પો રોકવાનો પ્રયાસ કરતા ચાલક ટેમ્પો લઈને નાસી છૂટ્યો

બાતમી મુજબનો ટેમ્પો આવતા પોલીસે રોકવાની કોશિશ કરી હતી. જો કે ચાલક ટેમ્પો પૂરઝડપે હંકારી ભાગવા લાગ્યો હતો. પોલીસે તેનો પીછો કર્યો હતો. ત્યારે ઊંભેળ ગામની સીમમાં હાઇવે ઉપર ટ્રાફિક જામ હોવાથી પોલીસે ટેમ્પો ચાલક અરવીંદભાઇ શંકરભાઇ વળદે તથા ક્લીનર અંગદ છોટેલાલ યાદવને ઝડપી પાડ્યો હતો.

ટેમ્પોની પાછળ બનાવેલા ચોર ખાનામાંથી મળી આવ્યો વિદેશી દારૂ

પોલીસે ટેમ્પાની પાછળના ભાગે તપાસ કરતાં ટેમ્પામાં ભરેલ ખાલી કેરેટ ઉતારી હતી અને ટેમ્પામાં બનાવેલા ચોરખાનામાંથી વિદેશી દારૂની 624 નંગ બોટલ એટલે કે, કુલ રૂ. 3,20,400 નો જથ્થો ઝડપી પાડ્યો હતો. જ્યારે પોલીસે વિદેશી દારૂ, ટેમ્પો, મોબાઈલ ફોન અને રોકડ રકમ મળી કુલ 5,31,400નો મુદ્દામાલ કબ્જે કર્યો હતો. જ્યારે આ ગુનામાં સંડોવાયેલ તોતાસિંગને વોંટેડ જાહેર કરી પકડાયેલ બંને વ્યક્તિના કોરોના ટેસ્ટ કરાવવાની તજવીજ હાથ ધરી છે.