સુરત જિલ્લાના માંગરોલ તાલુકાના સણધરા રતોરી અને ઓગણીસા ગામની વચ્ચે આવેલા બણભા ડુંગર જે ત્યાંની સ્થાનિક આદિવાસી પ્રજા માટે એક આસ્થાનું સ્થાન છે. ખાસ કરીને વર્ષોથી દશેરાના દિવસે અહીં મેળો ભરાય છે અને હજારોની સંખ્યામાં અહીં માનવ મહેરામણ દેવદર્શને અને મેળાની મજા માણવા ઉમટી પડ્યા હતા. ચાલુ વર્ષે ગુજરાત સરકાર દ્વારા આ બણભા ડુંગરને 5 કારોડના ખર્ચે પ્રવાસન સ્થળ તરીકે વિકસિત કરવામાં આવ્યું છે.
મંગળવારે દશેરાના દિવસે સ્થાનિક ધારાસભ્ય અને ગુજરાત સરકારના વનવિભાગ, મહિલા અને બાળ કલ્યાણ પ્રધાન ગણપત વસાવાએ બણભા દાદાના દર્શન કર્યા હતા. બણભા ડુંગરને સરકાર દ્વારા પ્રવાસન સ્થળ તરીકે વિકસિત કરાતા આ એક ધાર્મિક સ્થળની સાથે સાથે કુદરતની સોળેકળાઓ ખીલી ઉઠતી હોય છે અને આ બણભા દાદા સાથે આદિવાસી લોકોની આસ્થા જોડાયેલી છે. અહીં કોઈ પણ મનોકામના માગવામાં આવે તો બણભા દાદા તેઓની દરેક મનોકામનાઓ અચૂક પૂર્ણ કરતા હોય છે.
માંગરોલ તાલુકો એટલે જંગલથી ઘેરાયેલો વિસ્તાર અને તેમાં પણ સરકાર દ્વારા પ્રવાસન સ્થળ તરીકે બણભા ડુંગરને વિકસાવવામાં આવતું હોય તો સહેલાણીઓ મોટી સંખ્યામાં દેવ દર્શને તેમજ સૌંદર્યની મજા માણવા આવશે. તે ઉપરાંત સ્થાનિક આદિવાસીઓ માટે અચૂક આ એક રોજગારીની તક પણ ઉભી થઇ છે.