- બારડોલીની વિદ્યાર્થિનીઓએ ઈન્ડિયા બુક ઓફ રેકોર્ડમાં દાવેદારી નોંધાવી
- સ્કેટિંગ દ્વારા 24 કલાકમાં 135 કિમીનું અંતર કાપ્યું
- સ્ટેચ્યું ઑફ યુનિટીથી બારડોલી સુધીની સફર
સુરત: બારડોલીની 10 વિદ્યાર્થિનીઓએ પ્રજાસત્તાક દિન નિમિત્તે સરદારથી સરદારની સફર સ્કેટિંગના માધ્યમથી પૂર્ણ કરી હતી. સ્ટેચ્યું ઓફ યુનિટીથી બારડોલીના સરદાર મ્યુઝિયમ સુધીના 135 કિમી સુધી નોનસ્ટોપ સ્કેટિંગ કરી હતી. 24 કલાકમાં આ સફર પૂર્ણ કરી ઈન્ડિયા બુક ઓફ વર્લ્ડ રેકોર્ડમાં નામ નોંધાવવા માટે દાવેદારી કરી છે.
નારી સશક્તિકરણના સંદેશ સાથે 10 વિદ્યાર્થિનીઓએ કર્યું સ્કેટિંગ
બારડોલીની જાણીતી સંસ્થા ધૂમકેતુ અને કેન એકેડમી દ્વારા નારી સશક્તિકરણની ઝુંબેશ સાથે 10 જેટલી વિદ્યાર્થીનીઓ કાવ્યા કંથારીયા, જીયા ચૌધરી, મહેક ચૌધરી, રિદ્ધિ પટેલ, ચીતરંગી પટેલ, વૃન્દા ચૌધરી, ક્રિષ્ના પટેલ, પ્રાર્થના સોલંકી, સોનિયા દેવલાની અને ટ્વિકલ ઠાકરે એક અનોખી સિદ્ધિ હાંસલ કરી છે. 25મી જાન્યુઆરીના રોજ સવારે 8 વાગ્યે સ્ટેચ્યું ઓફ યુનિટી ખાતેથી ગુજરાત રાજ્ય બાળ આયોગના પૂર્વ ચેરપર્સન ભારતીબેન તડવીએ નોન સ્ટોપ સ્કેટિંગને લીલીઝંડી આપી હતી.
બારડોલીમાં કરવામાં આવ્યું સ્વાગત
સ્ટેચ્યું ઓફ યુનિટીથી શરૂ થયેલી આ સફર બીજા દિવસે 26 જાન્યુઆરીના રોજ સવારે 8 વાગ્યે 24 કલાકમાં 135 કિમીનું અંતર કાપી પૂર્ણ થઈ હતી. જ્યાં તેમનું બારડોલીના સ્થાનિક નેતાઓએ ઉત્સાહપૂર્વક સ્વાગત કરી અભિનંદન પાઠવ્યા હતા. વિદ્યાર્થિનીઓએ આ સફર પૂર્ણ થતાં જ ઈન્ડિયા બૂક ઓફ રેકોર્ડમાં દાવેદારી નોંધાવી છે.
