સુરતઃ તાપી નદી પરના ઉકાઈ ડેમમાં પાણીની આવકમાં ઘટાડો નોંધાયો છે. અત્યારે ઉકાઈ ડેમમાં 97,370 ક્યુસેક પાણી છે જ્યારે 1,49,754 ક્યુસેક પાણી તાપી નદીમાં છોડી દેવામાં આવી રહ્યું છે. આ ડેમના 14 દરવાજા 5 ફિટ સુધી ખોલી નાંખવામાં આવ્યા છે. જેમાંથી આ પાણી તાપી નદીમાં ઠલવાઈ રહ્યું છે. જોકે નવા પાણીનો જથ્થો ઘટતા હાલ સુરત પંથકમાં પૂરનું સંકટ ટળી ગયું છે.
પાણીની આવક 97,370 ક્યુસેક થતા હાશકારોઃ ઉપરવાસમાં પડેલા ભારે વરસાદને પગલે કેચમેન્ટ વિસ્તારમાંથી ઉકાઈ ડેમમાં 17 સપ્ટેમ્બરના રોજ 4,23,000 ક્યુસેક પાણીની આવક થઈ હતી. જેથી આ પાણીને તાપીમાં છોડવામાં આવી રહ્યું હતું. તાપી બંને કિનારે ધસમસતી વહી રહી હતી. આ સ્થિતિમાં તંત્ર દ્વારા પૂરના સંકટ સામે લડી શકાય તે માટે તૈયારીઓ કરવામાં આવી હતી. જો કે આજે ત્રીજા દિવસે નવા પાણીની આવક માત્ર 97,370 ક્યુસેક થઈ છે.જેથી તંત્ર દ્વારા હાશકારો અનુભવવામાં આવ્યો છે. ઉકાઈ ડેમમાં પાણીનો જથ્થો ભયજનક સપાટી વટાવી ચૂક્યો હતો પરંતુ આજે પાણી ભયજનક સપાટી પરથી નીચે ઉતરીને માત્ર 342.58 ફિટની સપાટી પર આવી ગયું છે.