સુરતના ઇચ્છાપોરના મોલમાં ચોરી કર્યા બાદ આ ગેંગના સભ્યો તમામ બિહાર નાશી છૂટ્યા હતા. આ ગેંગના સભ્યોને શોધવા જ્યારે સુરત ક્રાઇમ બ્રાન્ચની ટીમ બિહાર પહોંચી ત્યારે માલૂમ પડ્યું કે આ તમામ આરોપીઓ હાલ નેપાળમાં છે. પરંતુ, ક્રાઇમ બ્રાન્ચની ટીમને સાથે બાતમી મળી હતી કે આ ગેંગના સભ્ય રેકી કરવા માટે સુરત પરત આવી રહ્યા છે. ત્યારથી જ ક્રાઇમ બ્રાન્ચની ટીમ દ્વારા વોચ રાખવામાં આવી હતી.
દરમિયાન ટીમનો સભ્ય મોહમ્મદ સફીક તેલી સુરત આવતા તુરંત જ ક્રાઇમ બ્રાન્ચની ટીમે તેને ઝડપી લીધો હતો. તેની કડક પૂછપરછમાં આ ગેંગની મોડસ્ ઑપરૅન્ડી અંગે સનસનીખેજ ખુલાસો થયો હતો. આ ગેંગ સાથે સંકળાયેલા તમામ લોકો બિહારના ઘોડાસહન ગામના રહેવાસીઓ છે. જેના કારણે તેમની ગેંગનું નામ પણ ઘોડાસહન જ છે. તેઓ મોટા શહેરોમાં જ ચોરી કરે છે. અને ચોરીમાં પણ તેઓ માત્ર મોબાઈલ અને ઘડીયાળની જ ચોરી કરે છે. કારણ કે , તેમના ગામથી 15 કી.મી દુર નેપાલમાં જઈ તેઓ ચોરેલો સામાન આસાનીથી વહેંચી શકે છે. ચોરીની ઘટનાને અંજામ આપતા પહેલા તેઓ બરાબર રેકી કરે છે. પછી મોકો જોઈ મોટા શો રુમમાં ચોરી કરી બિહાર નાસી જાય છે. બિહારથી નેપાળ જઈ સામાનને તાત્કાલીક વહેંચી મારે છે. આ ગેંગનો મુખ્ય લીડર મહંમદ સિરાજ છે. 11 સભ્યોની આ ગેંગના લોકોને સિરાજ પૂરતા નાણાં આપી ચોરી કરવા અને રેકી કરવા મોટા શહેરોમાં મોકલે છે.
પોલીસે પકડાયેલા આરોપીને પુછતા તેણે ગુનો કબુલી લીધો હતો. તેમજ ઈચ્છાપોરમાં ચોરી કરતા પહેલા મોરા ગામમાં રોકાયા હોવાનું જણાવ્યું હતું. તેમજ ચોરી પહેલા રેકી કરી હોવાનું સ્વીકાર્યુ હતું. આ એક ચોરની ધરપકડ પછી દેશમાં થયેલી મોટી ચોરીના ભેદ ઉકેલાય તેવી સંભાવના છે.
