સુરતમાં નવરાત્રીમાં આરોગ્ય વિભાગ દ્વારા ઉકાળાનું વિતરણ કરાયુ

સુરતઃ નવલા નોરતા ચાલી રહ્યા છે, ત્યારે બારડોલીમાં લોટસ ગ્રુપ દ્વારા ગરબા મેદાનમાં અનોખું આયોજન કરવામાં આવ્યું હતું. સુરત જિલ્લા પંચાયતના આરોગ્ય વિભાગ દ્વારા સ્વાઈન ફલૂથી બચવા ઉપાય ભાગ રૂપે ઉકાળાનું વિતરણ કરાયું હતું.

માં આદ્યશક્તિના નવલા નોરતા ચાલી રહ્યા છે, ત્યારે બારડોલી પંથકના ગરબા આયોજનમાં વિવિધ જાગૃતિ રૂપ આયોજનો કરાઈ રહ્યા છે. સ્વરાજ આશ્રમ મેદાન ખાતે લોટસ ગ્રુપના ગરબામાં જિલ્લા પંચાયતના આરોગ્ય વિભાગ દ્વારા ઉકાળાનું વિતરણ કરાયું હતું. સ્વાઈન ફલૂ રોગ ફેલાવો ન થાય તે માટે ગરબા મેદાનમાં ઉકાળા માટે સ્ટોલ મુકવામાં આવ્યા હતાં. સ્વાઈન ફલૂ રોગની એક માસમાં દક્ષિણ ગુજરાતમાં નોંધપાત્ર બનાવો સામે આવ્યા છે, ત્યારે આવા સમયે જાગૃતિ જરૂરી હોય છે અને જેના ભાગ રૂપે સુરત જિલ્લા પંચાયત પણ સતર્ક બન્યું છે.

સ્વાઈન ફલૂ હોય કે લેપ્ટોસ્પારસીસ સુરત જિલ્લામાં મોસમ અનુસાર બનાવો પ્રકાશમાં આવતા હોય છે, ત્યારે વરસાદે પણ વિરામ લેતા જિલ્લા પંચાયત દ્વારા ગરબા મેદાન જેવા ભીડવાળા વિસ્તારો પસંદ કરાય છે. જ્યાં મોટી સંખ્યામાં લોકો આવતા હોય છે. તે જ હેતુ સાથે બારડોલી લોટસ ગરબામાં સ્વાઈન ફલૂના ઉકાળાનું સ્થાનિક પદાધિકારીઓએ આમ જનતાને વિતરણ કર્યુ હતું.