શહેરમાં લોકોના જાનમાલની સુરક્ષા તેમજ વાહનચાલકો ટ્રાફિકના નિયમોનું પાલન કરે તે માટે PPP ઘોરણે કરોડોના ખર્ચે શહેરભરમાં 600 જેટલા CCTV કેમેરા લગાવવામાં આવ્યાં હતાં. જેના થકી ટ્રાફિકના નિયમોનું ઉલ્લંઘન કરનાર વાહનચાલકોની સામે પોલીસ કંટ્રોલરૂમમાંથી બેઠા-બેઠા પોલીસ ઈ-ચલણ ઈસ્યુ કરે છે.
છેલ્લા પોણા સાત વર્ષમાં પોલીસે વાહનચાલકોને 46.76 લાખના ઈ-મેમો આપીને 121 કરોડનો દંડ ફટકાર્યો છે. જેની સામે વાહનચાલકોએ અત્યાર સુધીમાં માત્ર 10.50 કરોડનો દંડ ભર્યો છે. બાકીના 110 કરોડનો દંડ હજુ ભરાયો નથી. જેના પગલે ટ્રાફિક પોલીસે 110 કરોડનો દંડ ઉઘરાણી કરવા માટે વાહનચાલકોને નોટીસ આપી ટ્રાફિકની સ્પેશિયલ સ્ક્વોડ બનાવી ઉઘરાવવાનું શરૂ કર્યુ છે.
આ ઉપરાંત ચાલકો વિરૂદ્ધ કાર્યવાહી શરૂ કરી છે. 100થી વધુ ઈ-ચલણો ઇશ્યુ થયા છે. જેમાં 1700 વાહનોની દંડની રકમ 30 હજારથી વધુની છે. જેમાં મોટાભાગે ઓટો રિક્ષાનો દંડ સામેલ છે. કારણ કે, રિક્ષાચાલકો ડ્રાઇવર સીટ પર પેસેન્જરને બેસાડે છે. જેથી તેમની પાસેથી દંડ વસૂલવામાં આવે છે.
ઉલ્લેખનીય છે કે, ટ્રાફિક પોલીસે પહેલા 100થી વધુ ચલણ હોય તેવા વાહનચાલકો સામે કાર્યવાહી કરવાની શરૂઆત કરી છે. કેટલીક વખત ઓનલાઈન મેમો આવવાની જાણ વાહનચાલકને હોતી નથી. જેથી ઈચલાન ડોટ પરિવહન ડોટ ગો ડોટ ઈન વેબસાઈટ પર જઇને ચેક ચલાન સ્ટેટ્સ ઓપ્શનમાં જઇને મેમો અંગે જાણકારી મેળવવાની વ્યવસ્થા પણ કરાઈ છે. જેમાં મેમો ભરવાનો બાકી હોય તો વાહનચાલકો ઓનલાઈન ભરી શકે છે. તેમજ જો ચલાન નોટ ફાઉન્ડ એવું ઓપ્શન દેખાઈ તો કોઈ જ પ્રકારનું ચલણ ભરવાની જરુર રહેતી નથી. કારણ કે, અહીં માત્ર વાહનને મળેલાં ઓનલાઈન મેમોની જ વિગતો દર્શાવવામાં આવે છે.