જિલ્લા કલેક્ટરે અખાત્રીજ નિમિત્તે બાળલગ્ન અટકાવવા બનાવી વિવિધ ટીમ

સુરત: હિંદુ પરંપરા મુજબ અક્ષય તૃતીયા નિમિત્તે મોટા પ્રમાણમાં લગ્ન સમારોહ યોજાય છે. જેથી સુરત જિલ્લા કલેક્ટર ધવલ પટેલ દ્વારા આગામી અખાત્રીજ નિમિત્તે જિલ્લામાં યોજાતા બાળલગ્ન અટકાવવા વિવિધ ટીમોની રચના કરાઈ છે.

ઘણા જાતિ સમુદાયોમાં સગીર છોકરા-છોકરીઓના લગ્ન અખાત્રીજના દિવસે કરવાના રિવાજ પ્રચલિત છે. આગામી તારીખ 7 મે ના રોજ "અક્ષયતૃતિયા" (અખાત્રીજ) નિમિત્તે સુરત જિલ્લામાં બાળલગ્નો થવાની સંભાવના છે. જેથી વહિવટીતંત્ર દ્વારા જિલ્લામાં યોજાતા બાળલગ્નો અટકાવવા અને તેનાથી થતી દૂરગામી અસરોથી બચવા માટે જિલ્લા કલેકટર ડો.ધવલ પટેલના માર્ગદર્શન હેઠળ જિલ્લા વહિવટીતંત્ર, પોલીસ અધિકારીઓ, મામલતદારો, તાલુકા વિકાસ અધિકારીઓ વગેરેને બાળ લગ્ન પ્રતિબંધક અધિકારી સહજિલ્લા સમાજ સુરક્ષા અધિકારી અને જિલ્લા બાળ સુરક્ષા અધિકારી સાથે સંકલન કરી બાળલગ્ન પ્રતિબંધક ધારો-2006 ના અમલીકરણ માટે અલગ અલગ ટીમોની રચના કરવામાં આવી છે.

આ ટીમ ખાસ કરીને ગ્રામ્ય વિસ્તારોમાં તપાસ હાથ ધરીને બાળલગ્ન કરાવનાર, લગ્નમાં ભાગ લેનાર તમામ, સંચાલન કરનાર, મદદગારી કરનાર, બાળકના વાલી, લગ્નના આયોજકો, લગ્નવિધિ કરાવનાર મંડપ ડેકોરેશન, કેટરીંગ વગેરે સામે સખત કાયદાકીય પગલા ભરાશે.

કલેકટર કચેરીથી બાળ લગ્ન અંગેની જાણકારી આપવા તેમજ જરૂરી વિગતો માટે કચેરીના ફોન નંબર પણ જાહેર કરવામાં આવ્યા છે. 0261-2651452/2652467...ઉપરાંત ચાઇલ્ડ લાઇન નં.1098, પોલીસ નં.-100, મહિલા હેલ્પલાઇન નં.-181 ઉપર સંપર્ક કરવા જિલ્લા બાળ સુરક્ષા એકમની યાદીમાં જણાવાયું છે.