સુરત: અઠવાડિયા અગાઉ વેસુ બિગબજાર નજીક 'એવલોંસ ધ બિઝનેસ હબ'ના ગ્રાઉન્ડ ફલોરમાં ઇન્ડિયન બેંકના ATMમાં વહેલી સવારે તસ્કરો ત્રાટકયા હતા. આ તસ્કરોએ કેશ સ્ટોરેજનો દરવાજો તોડવાનો પ્રયાસ કરતા ATM સેન્ટરમાં લગાવવામાં આવેલી એલાર્મ સિસ્ટમ સ્ટાર્ટ થઇ જતા તસ્કરો ભાગી ગયા હતા.
આ ઘટનામાં ઉમરા પોલીસે CCTVના આધારે તપાસ હાથ ધરી હતી. જે અંતર્ગત ઉમરા પોલીસને મળેલી બાતમીના આધારે ત્રણ પૈકી 2 ચોર શબુરઅલી જ્હાનુદ્દીન શેખ અને સાહીદઅલગી મુકામઅલીને ઝડપી પાડવામાં સફળતા મળી હતી.
ઉલ્લેખનીય છે કે, વતન ભાગી છૂટેલા તેમના ત્રીજા સાથીદાર અલી અક્બર સાથે તેઓ રાત્રીના સમયે ચોરી કરવા નીકળ્યા હતા. ઓટો રીક્ષામાં મજુરા ગેટ અને નવી સિવિલ હોસ્પિટલ સહિત ત્રણથી ચાર ઠેકાણે ATMમાં ચોરી કરવા માટે ગયા હતા. પરંતુ ATM સેન્ટરમાં લોકોની અવરજવર વધુ હોવાથી ત્યાંથી તેઓ પરત વેસુ આવ્યા હતા. તેમજ ઇન્ડિયન બેંકના એટીએમમાં અવરજવર નહી હોવાથી એટીએમના કેશનો દરવાજો તોડવાનો પ્રયાસ કર્યો હતો. પરંતુ એલાર્મ સિસ્ટમ ર્સ્ટાટ થઇ જતા ભાગી ગયા હતા.