ફાર્મ હાઉસમાં દારૂની મહેફિલ માણતા 10 દારૂડિયાઓને સુરત LCBએ કરી અટકાયત

સુરત: જિલ્લાના પલસાણા તાલુકાના નિયોલ ગામે આવેલા એક ફાર્મ હાઉસમાં રવિવારે મોડી રાત્રે દારૂની મહેફિલ માણતા 10 દારૂડિયાઓને પોલીસે ઝડપી પાડ્યા છે. પોલીસે તમામ દારૂડિયાઓનું મેડિકલ કરી 2.36 લાખનો મુદામાલ કબ્જે કર્યો છે.

સુરત ગ્રામ્ય એલ.સી.બી અને કડોદરા જી.આઈ.ડી.સી પોલીસે પલસાણા તાલુકાના નિયોલ ગામે આવેલા યશ ફાર્મ હાઉસમાં મોડી રાત્રે દારૂની મહેફિલ માણતા 10 દારૂડિયાઓને પકડી પાડ્યા છે. આ તમામ પકડાયેલા દારૂડિયાઓ પૈકી પુણા કુંભરીયા ગ્રુપ કો.ઓ.ફૂડ એન્ડ વેજીટેબલ ગોઅર્સ સોસાયટી લી. ના પી.કે.એસ પ્રમુખ જગુ પટેલનો પણ સમાવેશ થાય છે. દારૂની મહેફિલ માણતા ભરત ગોહિલ, દિનેશ પટેલ, દિપક પરમાર, સંજય પ્રજાપતિ, નિલેશ પટેલ, કપિલ પટેલ, આશિષ પટેલ, અજય પટેલ તેમજ કનૈયા ખીચીને ઝડપી મેડિકલ કરાવ્યું હતું.

પોલીસ દ્વારા ફાર્મ હાઉસ પર દરોડા કરી દારૂની મહેફિલ માણતા 10 લોકોને ઝડપી પાડી પોલીસ મથકે લાવતાની સાથે જ રાજકીય આગેવાનો પોલીસ મથકે દોડી આવ્યા હતા અને ભલામણોનો દોર શરૂ કરી દીધો હતો. હાલ તો પોલીસે દારૂની મહેફિલ માણતા 10ની અટક કરી છે અને આ તમામ પાસેથી મોબાઈલ તેમજ રોકડ મળી 2.36 લાખનો મુદ્દામાલ જપ્ત કર્યો છે.