સુરત :પાંડેસરા વિસ્તારમાં આવેલ પાંડેસરા GIDC ખાતે આવે પ્લોટ નં.-163 ઉપર આવેલ પ્રેરણા મીલના ત્રીજા માળે અચાનક આગ લાગી હતી. આગ લાગવાની સાથે જ ભાગદોડ મચી ગઈ હતી. જોકે, સ્થાનિકો દ્વારા ફાયર વિભાગને જાણ કરતા ફાયર વિભાગની 14 જેટલી ગાડીઓ ઘટના સ્થળે પહોંચીને આગ ઉપર કાબુમાં લેવાનો પ્રયાસ કર્યો હતો. જોકે, કાપડની મીલ હોવાથી હાલ આગ ચાલુ જ છે.
2 ફાયરના જવાનો અને 2 કારીગરો ઇજાગ્રસ્ત
આ આગની ઘટનામાં 2 ફાયરના જવાનો અને બે કારીગરોને ઇજા પહોંચી છે. તેઓને તરત 108 એમ્બ્યુલન્સ મારફતે ખાનગી હોસ્પિટલમાં ખસેડવામાં આવ્યા છે. એક કર્મચારી પોતાનો જીવ બચાવા મીલમાંથી કૂદી પડ્યો હતો. તેને ખાનગી હોસ્પિટલમાં ખસેડવામાં આવ્યો છે. આગ એટલી વિકરાળ છે કે, આસપાસના લોકો દુર-દુરથી પોતાના ઘરેથી જોઇ શકતા હતા. આગના ગોટે-ગોટા ઉપર ઉડતા નજર આવતા હતા.
14 ફાયર સ્ટેશનોની ગાડીઓ ઘટનાસ્થળે
સુરતની મંદરવાજા, ભેસ્તાન, ડિંડોલી, અને મંજુર સહિત 14 ફાયર સ્ટેશનોની ગાડીઓ પહોંચીને આગને કાબુમાં લેવાનો પ્રયત્ન કરવામાં આવી રહ્યો છે. મીલમાં કાપડ હોવાથી આગ વધુને વધુમાં ફેલાતો જાય છે. જોકે, મીલમાં આગ લાગવાની સાથે જ જોરદાર બ્લાસ્ટ પણ થયો હતો. જેથી, લોકો એમથી તેમ દોડવા લાગ્યા હતા. જોકે, હજી સુધી આગ લાગવાનું કારણ એક બંધ છે.
