હવે દિલ્હીની જેમ સુરતમાં પણ કોરોના પોઝિટિવ દર્દીઓ ઘરે રહી સારવાર મેળવી શકશે

કોરોના વાઇરસના કહેર વચ્ચે હવે દિલ્હીની જેમ સુરતમાં પણ કોરોનાથી સંક્રમિત દર્દીઓ પોતાના ઘરે રહીને સારવાર મેળવી શકશે. આ પોઝિટિવ દર્દીઓ હોમ બેઇઝ ટ્રીટમેન્ટ મેળવી શકશે.

સુરતઃ હવે દિલ્હીની જેમ સુરતમાં પણ કોરોના પોઝિટિવ દર્દીઓ પોતાના ઘરે રહી સારવાર મેળવી શકશે. સુરતમાં હાલ 10 કોરોના પોઝિટિવ દર્દીઓ હોમ બેઇઝ ટ્રીટમેન્ટ મેળવી રહ્યા છે. શહેરમાં કેસો વધતા કતારગામ રાંદેર, અઠવા ઝોનમાં હોમ બેઇઝ ટ્રીટમેન્ટ લઈ રહ્યા છે.

કોરોના વાઇરસના વધતા જતા કેસોને ધ્યાનમાં રાખીને સુરત શહેરમાં અઠવા, કતારગામ રાંદેરમા હોમ બેઇઝ ટ્રીટમેન્ટ શરૂ થતા કોરોના પોઝિટિવ દર્દીઓ ઘરબેઠા સારવાર લઇ રહ્યા છે. સોમવારે બપોર સુધી 21 જેટલા પોઝિટિવ દર્દીઓ આવતા સુરતમાં કોરોના કેસોની સંખ્યા 2051 પર પહોંચી છે. સુરતમાં અત્યાર સુધી દર્દીઓની સારવાર સુરત નવી સિવિલ હોસ્પિટલ ખાતે થતી હતી, પરંતુ હવે મનપા દિલ્હી પેટર્ન અપનાવી આ દર્દીઓની સારવાર હવે ઘરમાં શક્ય બની છે અને શરતોને આધીન રહી હવે કોરોના વાઇરસ દર્દીઓ પોતાના ઘરે જ કોરોનાની સારવાર મેળવી શકશે અને હાલ સુરતમાં 10 જેટલા કોરોના વાઇરસ દર્દી પોતાના ઘરે જ સારવાર મેળવી પણ રહ્યા છે.

આ અંગે સુરત મ્યુનિસિપલ કમિશનર બંછા નિધી પાનીએ જણાવ્યું હતું કે, લોકો પોતાના ઘરે સારવાર મેળવી શકે તે માટે આયોજન કરવામાં આવ્યું છે. આ સારવારમાં મહત્વની બાબત એ છે કે, દર્દીને કોઇ પણ પ્રકારનું ગંભીર રોગ અગાઉથી ન હોવો જોઈએ, આ સાથે પોઝિટિવ દર્દીનું પ્લસ oximeter 95 ટકાથી ઓછું હોય તો ટ્રીટમેન્ટ ઘરે આપવામાં આવશે. આ ઉપરાંત દર્દીને એક ડોક્ટરના કન્સલ્ટન્સ હેઠળ પાલિકાને લેટર આપવાનું રહેશે. ઘરમાં એટેનડેન્ટ પણ હોવું ખુબ જ જરૂરી રહેશે.તેઓએ વધુમાં જણાવ્યું હતું કે, ઘરે સારવાર મેળવી રહેલા દર્દીને દિવસમાં બે વખત પોતાની સેલ્ફી અને હેલ્થ અંગે પાલિકાના કોરોના વોર રૂમમાં જાણકારી આપવાની રહેશે. જો દર્દીની તબિયત લથડે તો તેમને તાત્કાલિક હોસ્પિટલ ખસેડવામાં માટે દરેક ઝોનમાં એમ્બ્યુલન્સની સુવિધા પણ મૂકવામાં આવી છે.