સુરતઃ મહાનગર પાલિકા દ્વારા વેસ્ટમાંથી બેસ્ટ બનાવવાનો કોન્સેપ્ટ વિકસાવવામાં આવ્યો છે. જેમાં શહેરના મંદિરો-દરગાહ પરથી ફૂલોના વેસ્ટ ભેગા કરીને તેમાંથી અળસિયાના ખાતરનું ઉત્પાદન કરવામાં આવી રહ્યું છે. આ ખાતરનો ઉપયોગ મનપા પોતાના બાગ બગીચાઓમાં કરી રહી છે. જો કે ખાસ વાત એ છે કે, મંદિર-મસ્જિદ બંધ હોવા છતાં પણ ઝાડ પાનના વેસ્ટમાંથી ખાતાર બનાવાયું છે. અન્ય રાજ્યથી ડેલિગેશન આ પ્લાન્ટની મુલાકાત પણ લઈ રહ્યા છે.
આ ખાતર 100 ટકા ઓર્ગેનિક હોવાથી પર્યાવરણને ફાયદાકારક છે. જો કે, કોરોના કાળમાં પણ પ્લાન્ટ બંધ ન રાખતા ઝાડ-પાનના ટ્રીમિંગ વેસ્ટમાંથી ખાતર બનાવવાની કામગીરી મનપા દ્વારા હાથ ધરાઈ હતી. મહત્વની વાત એ છે કે, વિદેશોમાં પણ આ પ્રોજેક્ટ વખાણાય રહ્યો છે અને ઘણા વિદેશીઓ આ પ્રોજેક્ટની રૂબરૂ મુલાકાત પણ લઇ રહ્યા છે. સાથે જ હવે લોકો પણ જાગૃત થયા છે અને મંદિરમાં પૂજાપો ચડાવ્યા બાદ પોતે જ ખાતર બનાવવા માટે સેન્ટર પર આપી જતાં હોય છે.
પ્લાન્ટ ઈન્ચાર્જ એચ.સી.પટેલે જણાવ્યું કે, આ વર્ષે કોરોનાને કારણે મંદિર મસ્જિદ બંધ રહેવા છતાં પણ અમે ખાતર બનાવ્યું છે. ઝાડપાન અને નાના છોડવાઓના ટ્રીમિંગ બાદ જે કચરો નીકળે છે તેના દ્વારા આ ઓર્ગેનિક ખાતર બનાવ્યું છે. ઉલ્લેખનીય છે કે, છેલ્લા 3 વર્ષમાં 600 ટન કરતાં પણ વધુ કચરાનો ઉપયોગ કરીને 160 ટનથી વધુ અળસિયાના ખાતરનું ઉત્પાદન કરવામાં આવ્યું છે. બિહાર સહિત અન્ય રાજ્યોના ડેલિગેશન આ પ્લાન્ટની મુલાકાત લઈ ચૂક્યા છે. આ જ રીતે પ્લાન્ટ પોતાના રાજ્યમાં મૂકવાની તૈયારી તેઓએ બતાવી રહ્યા છે.
