સુરતમાં આપ કોર્પોરેટર ધર્મેન્દ્ર વાવલિયાએ 8 સિટી બસને રોકી ફિટનેસ સર્ટીફીકેટ માગી હંગામો મચાવ્યો

સુરતમાં આપ પાર્ટીના કોર્પોરેટર ધર્મેન્દ્ર વાવલિયાએ 8 સીટી બસને રોકી ફિટનેસ સર્ટીફીકેટ માગી હંગામો મચાવી દીધો હતો અને આશરે 200 જેટલા પ્રવાસીઓને રઝળાવ્યાં હતા. આ અંગે તેમની સામે કાપોદ્રા પોલીસ મથકમાં ફરિયાદ નોંધાતા તેઓની ધરપકડ કરાઈ હતી.

• કોર્પોરેટર ધર્મેન્દ્ર વાવલિયા ફરી એક વખત વિવાદમાં આવ્યા
• ભારે ટ્રાફિક જામ થઇ ગયો હતો અને પ્રવાસીઓ પણ રઝળ્યા
• આ મામલે પોલીસને જાણ થતા પોલીસ પણ ઘટના સ્થળે દોડી આવી

સુરત: આપ પાર્ટીના કોર્પોરેટર ધર્મેન્દ્ર વાવલિયા ફરી એક વખત વિવાદમાં આવ્યા છે. તેમણે 8 સીટી બસને રોકી ફિટનેસ સર્ટીફીકેટ માગી હંગામો મચાવી દીધો હતો અને આશરે 200 જેટલા પ્રવાસીઓને રઝળાવ્યાં હતા. આ અંગે તેમની સામે કાપોદ્રા પોલીસ મથકમાં ફરિયાદ નોંધાતા તેઓની ધરપકડ કરાઈ હતી. આ ઘટના અંગે મળતી માહિતી મુજબ પલસાણા ખાતે રહેતા રાહુલ ક્રિશ્ના રોકડે સિટી બસમાં ડ્રાઈવર તરીકે ફરજ બજાવે છે. બુધવારે રાહુલ સિટી બસને લઈને લંબેહનુમાન રોડ પર આવ્યો હતો અને તે બસમાં પ્રવાસીઓને લઈને વેલંજાથી પરત આવ્યો હતો. બસ કાપોદ્રા ઉત્રાણ બ્રીજ ક્રોસ કરીને કાપોદ્રા વિસ્તારમાં પહોચી ત્યારે તેની આગળ એક ફોરવ્હીલ ચાલકે ગાડી ઉભી રાખી બસને રોકાવી હતી. કાર ચાલકે કહ્યું કે હું આપ પાર્ટીનો કોર્પોરેટર ધર્મેન્દ્ર વાવલિયા છું. તારી બસનું સર્ટીફીકેટ બતાવ અને જ્યાં સુધી તું બસનું સર્ટીફીકેટ બતાવશે નહિ ત્યાં સુધી બસને જવા નહિ દઉં, જોકે ત્યાં સુધીમાં ત્યાં ભારે ટ્રાફિક જામ થઇ ગયો હતો અને પ્રવાસીઓ પણ રઝળ્યા હતા. જેથી રાહુલે તેના ઉપરી અધિકારીને ઘટના અંગે જાણ કરી હતી.

આ પણ વાંચો: સુરતમાં AAPના કોર્પોરેટર ધર્મેન્દ્ર વાવલિયાના ભાઈ મેહુલ વાવલિયા સામે દુષ્કર્મની ફરિયાદ, પોલીસે કરી ધરપકડ

પોલીસે બસના ડ્રાઈવર રાહુલની ફરિયાદ લઈને ધર્મેન્દ્ર વાવલીયાની ધરપકડ કરી

આમ આદમી પાર્ટીના કોર્પોરેટરેએ આવી જ રીતે બીજી 7 થી 8 બસો અટકાવી હતી. બસના ડ્રાઈવર રાહુલનો ઉપરી અધિકારી તાત્કાલિક ઘટના સ્થળે આવી પહોચ્યો હતો અને તેણે તમામ બસના ફીટનેસ સર્ટિફિકેટ બતાવ્યા હતા. આ દરમિયાન લોકોનું ટોળું એકઠું થઇ ગયું હતું અને હોબાળો મચ્યો હતો. જેથી આ મામલે પોલીસને જાણ થતા પોલીસ પણ ઘટના સ્થળે દોડી આવી ઘટના સ્થળે પરિસ્થિતિ થાળે પાડી હતી. આ ઘટનામાં પોલીસે બસના ડ્રાઈવર રાહુલની ફરિયાદ લઈને આપ પાર્ટીના કોર્પોરેટર ધર્મેન્દ્ર વાવલીયાની ધરપકડ કરી વધુ તપાસ હાથ ધરી છે.

આ પણ વાંચો: શિક્ષકોના વિરોધને આપ પાર્ટીએ સપોર્ટ કર્યો, ભણાવવાની જગ્યાએ અન્ય પ્રવૃત્તિમાં વ્યસ્ત રાખવામાં આવે છે

લોકોમાં પણ ભારોભાર નારાજગી પ્રવર્ત્તી

અત્રે ઉલ્લેખનીય છે કે, સરકાર તરફથી કોમર્શીયલ વાહનોનું સર્ટીફિકેટ રીન્યુ કરાવવા માટે ૩૦ મી સપ્ટેમ્બર સુધીનો વધારાનો સમય આપવામાં આવ્યો છે. ફિટનેસ સર્ટીની ચકાસણીનું કામ ટ્રાફિક પોલીસ કે આરટીઓ ડીપાર્ટમેન્ટનું છે. આમ છતાં વાવલીયાએ ગેરકાયદે બસ અટકાવી પ્રવાસીઓને બાનમાં લેતા લોકોમાં પણ ભારોભાર નારાજગી પ્રવત્તિ હતી. કોર્પોરેટરને ચઢેલા શુરાતનને પગલે લોકોએ અડધેથી બસ બદલી વાહનમાં પ્રવાસ કરવાનો વખત આવ્યો હતો.