બારડોલી નગરપાલિકાના 49 મતદાન કેન્દ્રો માટે 60 EVM સીલ

સ્થાનિક સ્વરાજની ચૂંટણીને લઈ વહીવટી તંત્ર દ્વારા EVM સીલ કરવામાં આવ્યાં હતાં. બારડોલી નગરપાલિકાની ચૂંટણી માટે કુલ 60 EVM સીલ કરી સ્ટ્રોંગ રૂમમાં મૂકવામાં આવ્યાં હતાં.

• સ્ટ્રોંગ રૂમ ખાતે EVM મશીનની સિલિંગ પ્રક્રિયા યોજાઇ
• ઉમેદવારોને સાથે રાખી EVM સીલ કરાયા
• BABS હાઈસ્કૂલ ખાતે બનાવવામાં આવેલા સ્ટ્રોંગ રૂમમાં મૂકવામાં આવ્યા EVM

સુરત : બારડોલી નગરપાલિકા સામાન્ય ચૂંટણીને લઈ વહીવટી તંત્ર સજ્જ થઈ ગયું છે. ગુરુવારના રોજ બારડોલીની BABS હાઈસ્કૂલ ખાતે આવેલા સ્ટ્રોંગ રૂમમાં ચૂંટણી અધિકારી અને હરીફ ઉમેદવારોની હાજરીમાં EVMસિલિંગની પ્રક્રિયા હાથ ધરવામાં આવી હતી.

28 ફેબ્રુઆરીના રોજ યોજાશે સ્થાનિક સ્વરાજની ચૂંટણી

રાજ્યમાં સ્થાનિક સ્વરાજની ચૂંટણી 28મી ફેબ્રુઆરીના રોજ યોજાવાની છે. ઉમેદવારી ફોર્મ ભરવાથી લઈ પરત ખેંચવાની પ્રક્રિયા પૂર્ણ થયા બાદ આખરી યાદી જાહેર કરવામાં આવી હતી.

આખરી યાદી જાહેર થતા જ EVM તૈયાર કરાયા

આખરી યાદી જાહેર થતાં જ વહીવટી તંત્ર દ્વારા EVM સિલિંગની પ્રક્રિયા હાથ ધરવામાં આવી હતી. EVMમાં મતદાન મથકદીઠ ઉમેદવારોના નામ અને ચિન્હ લગાવી તેને સીલ કરવામાં આવ્યાં હતાં. આ તમામ પ્રક્રિયા દરમિયાન ઉમેદવારોને હાજર રાખવામાં આવ્યાં હતાં.

EVM અને સ્ટેશનરી મેનેજમેન્ટ કરવામાં આવ્યું

બારડોલી નગરપાલિકામાં કુલ 49 જ બૂથ પર થશે મતદાન

બારડોલીના કુલ 49 બૂથ માટે 60 EVM મશીન સીલ કરી BABS હાઈસ્કૂલ ખાતે બનાવવામાં આવેલા સ્ટ્રોંગ રૂમમાં રાખવામાં આવ્યા છે. આ EVMમતદાનના દિવસે ઉપયોગમાં લેવામાં આવશે.

11 EVM અનામત રાખવામાં આવ્યાં

60 પૈકી 11 EVM અનામત રાખવામાં આવ્યા છે. જેથી કોઈ મશીન ખોટકાઈ તો તેના અવેજમાં ઉપયોગ કરી શકાય. સવારે 8.30 કલાકે આ કામગીરી શરૂ કરવામાં આવી હતી.

EVM અને સ્ટેશનરી મેનેજમેન્ટ કરવામાં આવ્યું

બારડોલીના ચૂંટણી અધિકારી અને નાયબ કલેકટર વી. એન. રબારીએ જણાવ્યું હતું કે, હરીફ ઉમેદવારોની યાદી સાથે EVM તૈયાર કરી સ્ટ્રોંગ રૂમમાં મૂકી દેવામાં આવ્યા છે. સ્ટેશનરી મેનેજમેન્ટની પ્રક્રિયા પણ કરવામાં આવી છે. ચૂંટણી અધિકારીએ તમામ નાગરિકોને મતદાન કરવા માટે અનુરોધ કર્યો હતો.