કોવિડ કેર સેન્ટરમાં ડૉક્ટર્સ-પેરામેડિકલ સ્ટાફની મદદ માટે 186 લોકોએ ઓનલાઈન આવેદન કર્યું

જિલ્લાના અલ્થાણ વિસ્તાર ખાતે આવેલા નવનિર્મિત કોમ્યુનિટી કોવિડ કેર સેન્ટરમાં ડોક્ટરો અને પેરામેડિકલ સ્ટાફની મદદ કરવા માટે 186 લોકોએ ઓનલાઈન આવેદન કર્યું હતું. આ તમામ લોકોની ટ્રેનિંગ સૂરતના સાયન્સ સેન્ટર ખાતે યોજવામાં આવી છે. ટ્રેનિંગમાં રાજ્યના આરોગ્ય અગ્ર સચિવ જયંતિ રવિએ હાજર રહી લોકોનો ઉત્સાહ વધાર્યો હતો. આ તમામમાં કેટલાક આવા લોકો પણ છે જે હાલ જ કોવિડને માત આપી સાજા થયા છે.

સુરત : જે રીતે રાજ્યમાં અને ખાસ કરીને સુરતમાં કોરોના પોઝિટિવ દર્દીઓની સંખ્યામાં સતત વધારો થઈ રહ્યો છે તેને ધ્યાનમાં રાખી હોસ્પિટલ ઉપરાંત સુરતમાં આઠ જેટલા કોમ્યુનિટી કોવિડ કેર સેન્ટર સમાજ દ્વારા તૈયાર કરવામાં આવ્યા છે. આ સેન્ટરમાં ડોક્ટર અને પેરામેડિકલ ટીમ તો હશે જ પરંતુ તેમની મદદ કરવા માટે શહેરીજનોને આહવાન કરવામાં આવ્યું હતું કે, તેઓ આ ભગીરથ કાર્યમાં સામેલ થાય. ગણતરીના કલાકોમાં અલથાણમાં આવેલા કોમ્યુનિટી કોવિડ કેર સેન્ટર માટે ઓનલાઈન 186 લોકોએ આવેદન પત્ર આપ્યું હતું અને આ તમામ આજે ટ્રેનિંગ લેવા માટે આવ્યા હતા. ટ્રેનિંગ કાર્યક્રમમાં અગ્ર સચિવ જયંતિ રવિ પણ હાજર રહીને તમામના નિર્ણયને બિરદાવ્યું હતું.

ટ્રેનિંગ મેળવવા આવેલા તમામ મેડિકલ ક્ષેત્ર સાથે સંકળાયેલા નથી. તેમાંથી કેટલાક લોકો તો હાલ જ કોરોનાની બિમારીને માત આપી સાજા થયા છે. તેઓ આ ભગીરથ કાર્યમાં પોતાનું યોગદાન આપવા માટે ટ્રેનિંગ લેવા આવ્યા હતા. જેથી કોવિડ કેર સેન્ટરમાં ફરજ બજાવી અન્ય દર્દીઓને સાજા થવામાં તેમની મદદ કરી શકે.