DGVCLની બેદરકારી, વીજકરંટ લાગવાથી યુવતીનું મોત

સુરત: શહેરમાં DGVCLની વધુ એક બેદરકારી સામે આવી છે. જેમાં ઘરમાં સાડીનું કામ કરતી 20 વર્ષિય કાજલ ચાવડાનું વીજ કરંટ લાગવાને કારણે મોત નિપજ્યું હતું. આ ઘટના CCTV માં કેદ થવા પામી હતી.

શહેરમાં 20 વર્ષિય યુવતી કાજલ રસ્તા પરથી પસાર થઈ રહી હતી. તે સમય દરમિયાન તે વીજ થાંભલાને અડકીને જતી હતી, તે દરમિયાન તેને વીજ કરંટ લાગતા ત્યાં જ પ્રાણ છોડી દીધા હતા. આ તમામ ઘટના CCTVમાં કેદ થવા પામી હતી. શહેરમાં વીજળીના તારો સોસાયટીના ઘરની નજીકથી જ પસાર થઈ રહ્યાં છે. જેના કારણે રહીશોને હંમેશા જીવનું જોખમ રહે છે.

રહીશો દ્વારા પોતાના લેટરપેડ પર DGVCLને કરાઈ રજૂઆત

આ અગાઉ પણ શહેરમાં આવેલી નરવેદ સાગર સોસાયટીના રહીશો દ્વારા DGVCLને ફરિયાદ કરવામાં આવી હતી. ઉપરાંત તાત્કાલિક ધોરણે વીજ તારોને ખસેડવા માટે પત્ર લખીને રજૂઆત કરવામાં આવી હતી. આ અંગે સોસાયટીના રહીશો દ્વારા 13 જૂન, 2019ના રોજ પોતાના લેટરપેડ પર DGVCLને રજૂઆત કરવામાં આવી હતી. તેમ છતા અધિકારીઓ મુક પ્રેક્ષક બની ગયા હતા. સાથે જ DGVCL દ્વારા કોઈ નક્કર કાર્યવાહી કરવામાં આવી ન હતી. DGVCLની આ ઘોર બેદરકારીને કારણે જ યુવતીને જીવ ગુમાવવાનો વારો આવ્યો હતો.