સાબરકાંઠાના હિંમતનગરમાં છેલ્લા ૨૪ કલાકમાં પાંચ ઇંચથી વધુ વરસાદ ખાબકયો છે. જેના પગલે નીચાણવાળા વિસ્તારોમાં પાણી ભરાયા હતા. તેમજ હાલમાં આ સોસાયટીઓમાં આવવા જવા માટે પણ ભારે તકલીફનો સામનો કરવો પડી રહ્યો છે. હિંમતનગરથી મહેસાણા રોડ પર આવેલી વિવિધ સોસાયટીઓમાં અત્યારે હાલ પણ કેટલાક વિસ્તારો પાણીમાં ગરકાવ છે.
તેમજ રસ્તાઓ ઉપર મોટા પ્રમાણમાં પાણી ભરાયેલું હોવાના પગલે સ્થાનિકો માટે ઘરની બહાર નીકળવું પણ એક સવાલ થઈ ચૂક્યો છે. હિંમતનગરની રોયલ પાર્ક સોસાયટીમાં હાલમાં ઘૂંટણ સમા પાણીમાં કોઈપણ પ્રકારનું વાહન આવી શકે તેમ નથી તેમ જ સોસાયટીઓમાંથી બહાર જવા માટે પણ કોઇ વ્યવસ્થા થઇ શકે તેમ નથી.
એક તરફ વિદ્યાર્થીઓનું આ દિવસો દરમિયાન શિક્ષણ બગડી રહ્યુ છે તો બીજી તરફ સ્થાનિક માટે આરોગ્યનો પણ મોટો સવાલ ઉભો થયો છે. ત્યારે, દર વર્ષે આ વિસ્તારમાં પાણીની સમસ્યા યથાવત્ રહેવા છતાં વહીવટી તંત્ર આંખ આડા કાન કરતું હોય તેવો ઘાટ સર્જાયો છે. જોકે સ્થાનિકોને પાણીની આ સમસ્યામાંથી ક્યારેય છૂટકારો મળશે તે તો આગામી સમય જ બતાવશે.
