સાબરકાંઠાના વિજયનગર તાલુકાના નાલશેરી ભગોરા ગામએ ખુલ્લા ખેતરમાંથી 10 ફુટ લાંબો અજગર મળી આવતા સમગ્ર વિસ્તારમાં ચકચાર સર્જાયો હતો. ગામની નજીકથી મળી આવેલા અજગરનાં લીધે મોટી સંખ્યામાં સ્થાનિકો જોવા ઉમટી પડયા હતા. જોકે વનવિભાગને આ મુદ્દે જાણ કરાતા વન અધિકારીઓ પણ તાત્કાલિક ધોરણે નાગેશેરી ગામે પહોંચી અજગરને પકડ્યો હતો.
મોટાભાગે આ વિસ્તારમાં અજગર સહિતના સરીસૃપ જોવા મળતા નથી. જોકે, અચાનક 10 ફૂટથી વધુ લંબાઇ ધરાવતો અજગર મળી આવતા સ્થાનિકોમાં પણ ભયનો માહોલ સર્જાયો હતો. ત્યારે, હાલમાં વન વિભાગના અધિકારીઓએ અજગરને ઝડપી લઇ વણજ ડેમ સાઇટ પર આવેલા જંગલમાં સુરક્ષિત સ્થળે છોડી મૂક્યો હતો. તેમજ સ્થાનિક ગ્રામજનોને અજગરની વિસ્તૃત માહિતી પણ આપી હતી.
જોકે આ વિસ્તારમાં સરીસૃપ અંગેની જાણકારી ઓછી હોવાના પગલે સ્થાનિક ગ્રામજનો આવા સાપ અજગર જેવા સરીસૃપોને મોતને ઘાટ ઉતારતા હોય છે. જોકે, અપાયેલી જાણકારીના પગલે આગામી સમયમાં આ વિસ્તારમાં સરીસૃપ પ્રત્યે ક્રૂરતા ન થાય તેવા પ્રયાસો હાથ ધરાયા છે.