ગોંડલમાં સાંજે 7 વાગ્યા પછી ધંધા રોજગાર બંધ, જ્યારે 9 વાગ્યા બાદ આવન-જાવન પર સંપૂર્ણ પ્રતિબંધ

ગોંડલમાં સાંજે સાત પછી ધંધા રોજગાર બંધ અને રાત્રે નવ પછી આવન-જાવન પણ બંધ રહેશે. મેડિકલ ઈમરજન્સી સિવાય રાત્રે જો કોઈ પણ શહેરમાં આટા ફેરા કરશે તો જાહેરનામા ભંગનો ગુનો નોંધાશે.

રાજકોટ: જિલ્લાના ગોંડલ શહેરમાં નવનિયુક્ત પોલીસ ઇન્સ્પેક્ટર એસ.એમ જાડેજાએ જણાવ્યું હતું કે, શહેરની ટ્રાફિક સમસ્યા અતિ ખરાબ થઇ રહી છે. રાજમાર્ગો અને ફૂટપાથો પર દબાણકારો દ્વારા પોતાની માલીકીની હોય તેમ વ્યાપક પ્રમાણમાં દબાણો કરાયા છે. જેના કારણે ટ્રાફિક સમસ્યા ઉદ્ભવી રહી છે.

પોલીસ તંત્ર દ્વારા પ્રથમ એક વખત સૂચના આપવામાં આવશે અને બાદમાં સીધી જ દંડાત્મક કાર્યવાહી હાથ ધરવામાં આવશે. આ ઉપરાંત વાહનચાલકોએ પણ ટ્રાફિક નિયમનનું પૂરેપૂરું પાલન કરવાનું રહેશે.

નવનિયુક્ત પોલીસ ઇન્સ્પેક્ટર એસ.એમ જાડેજા

કોરોના કહેર વચ્ચે લોકડાઉનના જાહેરનામાનું ચુસ્તપણે પાલન કરવામાં આવશે. સાંજે સાત વાગ્યા પછી ધંધા-રોજગાર ખુલ્લા રાખી શકાશે નહીં અને જો કોઈપણ ધંધાર્થી જાહેરનામાનો ભંગ કરશે તો દંડનાત્મક કાર્યવાહી થશે. રાત્રિના સમયે ઘણા લોકો દ્વારા શહેરમાં આંટાફેરા કરવામાં આવી રહ્યા છે તેઓને પણ ખાસ તાકીદ કરાઈ છે કે, રાત્રીના 9થી સવારના 5 સુધી મેડિકલ ઈમરજન્સી સિવાય કોઇપણ શહેરમાં આટા ફેરા કરી શકશે નહીં અન્યથા કાયદેસર કાર્યવાહી કરવામાં આવશે.

આ સાથે શહેરમાં ઘણી જગ્યાએ બિલાડીના ટોપની માફક ફૂટી નીકળેલા ગાંઠિયાના શોખીન લોકો દ્વારા ગેરકાનૂની પ્રવૃત્તિઓ કરવામાં આવી રહી છે. જેને પણ સંપૂર્ણપણે ડામી દેવામાં આવશે તેવું પણ જણાવ્યું હતું.