રાજકોટ મનપાની લાલ આંખ, સિંગલ યુઝ પ્લાસ્ટિકના વેચાણકારો પર દરોડા

રાજકોટઃ મહાનગરપાલિકા દ્વારા સિંગલ યુઝ પ્લાસ્ટિક પર પ્રતિબંધ લગાડવામાં આવ્યો છે. રાજકોટના અલગ અલગ વિસ્તારમાં સિંગલ યુઝ પ્લાસ્ટિકનું વેચાણ કરતાં અસામીઓને ત્યાં મનપાની સોલિડ વેસ્ટ શાખાની ટીમે દરોડા પાડ્યા હતા. તેમજ 70 હજાર જેટલો દંડ વસુલ્યો હતો.

સ્વચ્છ ભારત મિશન અંતર્ગત રાજકોટ શહેર વધુમાં વધુ સ્વચ્છ અને સ્માર્ટ બને તે માટે મનપા દ્વારા શહેરમાં સિંગલ યુઝ પ્લાસ્ટિક પર પ્રતિબંધ લગાડવામાં આવ્યો છે. જેના ભાગરૂપે રાજકોટ મનપાનાં સોલિડ વેસ્ટ વિભાગ દ્વારા શહેરનાં વિવિધ વિસ્તારમાં પ્રતિબંધિત પાન માવાનું પ્લાસ્ટિક ચેકીંગ કરવાની ઝુંબેશ હાથ ધરવામાં આવી હતી.

સિંગલ યુઝ પ્લાસ્ટિકનું વેચાણકર્તા પર દરોડા

સેન્ટ્રલ ઝોનમાંથી કુલ 53 અસામીઓ 45.5 કિગ્રા પ્રતિબંધિત પ્લાસ્ટિક સાથે ઝડપાયા હતા. તેમના પાસેથી 25,750નો દંડ વસુલ કરવામાં આવ્યો હતો. શહેરનાં પૂર્વઝોનમાંથી 22 કિગ્રા પ્લાસ્ટિક મળી આવ્યું હતું. જ્યાંથી 15,750નો દંડની વસુલાત કરાઈ હતી. આ સાથે જ શહેરના પશ્વિમઝોનનાં વિસ્તારમાંથી કુલ 83 અસામીઓ પાસેથી 54 કિગ્રા પ્રતિબંધિત પ્લાસ્ટિક કબ્જે કરાયું હતું. તેમજ તેમની પાસેથી 27,600નો દંડ વસુલ કરવામાં આવ્યો હતો.