રાજકોટ પોલીસે વેશ પલટો કરી આરોપીને ઓરિસ્સામાંથી ઝડપી પાડ્યો

રાજકોટઃ તાલુકા પોલીસમાં સગીરાનું ઓડિશાના યુવક દ્વારા અપહરણ કરવામાં આવ્યું હોવાની ફરિયાદ નોંધાઇ હતી. આથી, રાજકોટ પોલીસે તેની શોધખોળ હાથ ધરી હતી. ગુલશન બલયારસીંગ નામનો યુવક ઓડિશાના નક્સલી વિસ્તારમાં રહેતો હતો. રાજકોટની તાલુકા પોલીસની ટીમે ઓડિશા જઇ તેની ધરપકડ કરી હતી.

ઓડિશાના કંધમાલ જિલ્લાના નક્સલી વિસ્તારમાં બે દિવસ નક્સલી જંગલ વિસ્તારમાં વેશપલ્ટો કરી પોલીસે બંદુગીયા ખાતેથી ગુલશનને શોધી કાઢી તેની ધરપકડ કરી હતી. મીડિયા સાથે વાત કરતા DCP મનોહરસિંહ જાડેજાએ જણાવ્યું કે આ આરોપી યુવક 10 વર્ષથી ગુજરાતમાં રહે છે અને તે પરણિત છે, તેની પત્ની વતનમાં રહે છે. ભોગ બનનાર સગીરા અને આરોપી યુવક પાડોશી છે અને સગીરા જેનું અપહરણ થયું છે તે પરિવાર સાથે રાજકોટ રહેતી જે મૂળ ઓડિશાની છે. યુવકે તેનું અપહરણ નાના મોવાથી કર્યું હતું, ત્યારબાદ તે પોતાના વતન નાશી ગયો હતો. તપાસના આધારે તાલુકા પોલીસે તેને શોધી તેની ધરપકડ કરી હતી. જેમાં ઓડિશાના સ્થાનિક પોલીસે રાજકોટ તાલુકા પોલીસને સહયોગ કર્યો હતો. પોલીસ હાલ આરોપી યુવકની પુછપરછ કરી રહી છે.