આ નિમણૂંક અંગે બાંધકામ અને વોટરવર્કસ જેવા મહત્વના ખાતામાં નોંધનીય ફેરફાર કરાયા હતા. ભાજપ સદસ્ય પ્રવિણાબેન વઘાસીયાના પતિ જયસુખભાઈએ ચાલુ બેઠકમાં પોતાને ફાળવાયેલ ખાતુ નામંજૂર હોય પરત લેવાનું કહી વિરોધ કર્યો હતો.
ગોંડલ નગરપાલિકામાં વિવિધ કમિટીના ચેરમેનની નિમણૂંક કરાઈ
રાજકોટઃ ભાજપ શાસિત ગોંડલ નગરપાલિકામાં વિવિધ કમિટીઓના ચેરમેન પદની અઢી વર્ષની મુદત પૂર્ણ થતાં નવા ચેરમેનની નિમણૂંક માટે નગરપાલિકા કચેરીમાં મળેલી જનરલ બોર્ડની બેઠક મળી હતી. પ્રમુખ અશોકભાઈ પીપળીયા તથા ઉપપ્રમુખ અર્પણા બેન આચાર્યની અધ્યક્ષતામાં મળેલી બેઠકમાં ભાજપ મોવડી ધારાસભ્ય ગીતાબા જાડેજા, પૂર્વ ધારાસભ્ય જયરાજસિંહ જાડેજા તેમજ જેન્તીભાઈ ઢોલની સુચના મુજબ આંશિક ફેરફાર સાથે ચેરમેનોની નિમણૂંક કરાઈ હતી.
રાજકોટના ગોંડલ નગરપાલિકામાં વિવિધ કમિટીઓના ચેરમેનનોની નિયુક્તિ કરાઈ
ગોંડલ નગરપાલિકાના વિવિધ ખાતાઓના વરાયેલ ચેરમેનમાં કારોબારી અધ્યક્ષ તરીકે સિનિયર ગણાતા પૃથ્વીસિંહ જાડેજાની વરણી કરાઈ છે. જ્યારે મહત્વની ગણાતી બાંધકામ કમીટીમાં ચંદુભાઈ ડાભીને જગ્યાએ કૌશિકભાઈ પડાળીયાએ ચેરમેન પદનું સુકાન સંભાળ્યું છે, એ જ રીતે મહત્ત્વની ગણાતી વોટર વર્કસ કમિટિના યુવા સદસ્ય અનિલભાઈ માધડની ચેરમેન પદે વરણી કરાઈ છે, અન્ય કમિટીમાં વાહન વ્યવહાર મનિષાબેન સાવલિયા, વીજળી કમિટી રવિભાઈ કાલરીયા, સેનિટેશન કમિટી સવિતાબેન મકવાણા, સ્ટાફ સિલેક્શન વિજયાબેન વાવડીયા, માધ્યમિક શિક્ષણ મુક્તાબેન કોટડીયા, હેલ્થ કમિટી ગૌતમભાઈ સિંધવ, આવાસ યોજના ચેતનભાઇ ઠુંમર, વેજીટેબલ કમિટી રંજનબેન સરધારા, ટાઉન પ્લાનિંગમાં નિર્મળાબેન ધડુકની વરણી કરાઈ છે, સદસ્યા પ્રવિણાબેન વઘાસિયાને એન યુ એલ એમ કમિટી સોંપતા તેમના પતિ જયસુખભાઇ વઘાસિયાએ ચેરમેન પદ સ્વીકારવાનો વિરોધ કરી નારાજગી દર્શાવી હતી, આ અગાઉ પણ જયસુખભાઇ વઘાસિયાએ ચેરમેન પદની વરણી વેળા મવડી મંડળના નિર્ણય સામે નારાજગી દર્શાવી હતી.