રાજકોટ : રાજકોટના જસદણમાં કોઈપણ વ્યક્તિઓએ ક્યારેય વિચાર્યું ન હોય તેવો ચોંકાવનારો શરમજનક કિસ્સો સામે આવ્યો હતો. જસદણના ચિતલીયા રોડ પર આવેલા ઉમિયાનગર વિસ્તારમાં રહેતી 200 જેટલી મહિલાઓને બદનામ એક શખ્સ સતત હેરાન કરી રહ્યો હતો. મહિલાઓના મકાનમાં અવારનવાર કોઈ અજાણ્યા માનસિક વિકૃત શખ્સ દ્વારા 10 વર્ષથી વધુ સમયથી ચલણી નોટોમાં બિભત્સ શબ્દો લખેલી ચિઠ્ઠીઓ નાંખી હેરાન પરેશાન કરતો હતો. વિસ્તારની મહિલાઓ અને પુરુષો દ્વારા પોલીસ મથકમાં લેખિત રજૂઆત કરવામાં આવતા જસદણ પંથકમાં ચકચાર મચી ગઈ હતી.
મહિલાઓને ડર :આ પ્રકારના કિસ્સા અંગે આજદિન સુધી મહિલાઓ પોતાની બદનામી થવાના ડરથી કોઈને કહેતી ન હતી,પરંતુ એક અજાણ્યા વિકૃત માનસિકતા ધરાવતા શખ્સે પોતાની હદ વટાવી દેતા મહિલાઓ ભારે મુંજવણમાં મુકાઈ ગઈ હતી. જેથી વિસ્તારના આગેવાનોએ માનસિક વિકૃત માણસના ત્રાસથી કંટાળી જઈને નગર સેવકને આ બાબત અંગે જાણ કરી હતી. જેથી આગેવાનોએ મહિલાઓની સહીવાળી તૈયાર કરેલી લેખિત રજૂઆત જસદણ પોલીસ સ્ટેશને આપતા પોલીસ પણ આ શરમજનક કિસ્સો સાંભળીને અને પુરાવાઓ જોઈને ચોંકી ઉઠી હતી. આ બનાવમાં જસદણ પોલીસે તે વિસ્તારની મહિલાઓની રજૂઆતના પગલે આગળની કાર્યવાહી હાથ ધરી હતી.
મહિલાનો બદનામ કરતો લેખિત રજૂઆત જણાવ્યું છે કે, અમારા વિસ્તારની મહિલાઓને બદનામ કરવા માટે અજાણ્યો શખ્સ 10 વર્ષથી હેરાન પરેશાન કરી રહ્યો છે. આ શખ્સ મહિલાઓના નામજોગ ચિઠ્ઠીઓ ઘરમાં નાખે છે. શારીરિક બદનામ કરતી ચિઠ્ઠીઓ નાખીને નાની મોટી ઉંમરની મહિલાઓ વિશે અભદ્ર ભાષામાં ચિઠ્ઠીઓ લખીને અવારનવાર નાખે છે. આ શખ્સ 10, 20, અને 50ની રુપિયાની નોટમાં તેમજ અમુક ચિઠ્ઠીઓ લખીને નાખે છે. આ કારનામાં કરનાર શખ્સથી મહિલાઓને ઘરની બહાર નીકળવું મુશ્કેલ થઈ ગયું છે. અહીની મહિલાઓ પાસે તેની ચિઠ્ઠીઓ અને નોટો સહિતના તમામ પુરાવાઓ છે. જેથી વહેલી તકે આ શખ્સને પકડી પાડી કાયદાનું ભાન કરાવવામાં આવે અને આ શખ્સના ત્રાસથી મુકત કરવામાં આવે તેવી માંગ કરવામાં આવી હતી.
બે લોકોના નામ ભેગા લખતો :ચિતલીયા રોડની પાંચ આવેલા ઉમિયાનગર 1, ભગવાન પરા વિસ્તાર, ચિતલીયા રોડ વિસ્તાર, હિરપરા નગર 1 અને 2, સ્વામિનારાયણ નગર અલગ અલગ સોસાયટીની શેરીમાં હેરાન કરતો હતો. આ શખ્સચિઠ્ઠીઓમાં એક ભાઈનું અને બીજા બહેનનું નામ ભેગું લખીને વાંચીએ તો વંચાય નહી એટલી ખરાબ ભાષામાં લખે છે. આ શખ્સ ચલણી નોટોમાં આવું બીભત્સ લખાણ કર્યું હોવાથી તેણે લક્ષ્મીજીનું અપમાન પણ કર્યું હોવાનું માનું છું.