રાજકોટમાં વૃદ્ધની હત્યા, પોલીસે ગણતરીની કલાકોમાં જ હત્યાનો ભેદ ઉકેલ્યો

રાજકોટના મોરબી રોડ પર આવેલા ગોડાઉન નજીક એક અજાણ્યા પુરુષનો મૃતદેહ મળી આવ્યો હતો. પોલીસે ગણતરીની કલાકોમાં જ હત્યાનો ભેદ ઉકેલી નાખ્યો હતો. તેમજ મૃતકની ઓળખ મેળવીને આરોપીઓને પણ ઝડપી પાડ્યા હતા. હાલ પોલીસે પતિ-પત્ની બન્ને આરોપીઓની ધરપકડ કરી વધુ કાર્યવાહી હાથધરી છે.

રાજકોટઃ મોરબી રોડ પર આવેલા ગોડાઉન નજીક એક અજાણ્યા પુરુષનો મૃતદેહ મળી આવ્યો હતો. જો કે, મૃતદેહ પર ઇજાના નિશાન હતા સાથે જ મૃતદેહ જે જગ્યાએથી મળી તેની નજીકમાં લાગેલા સીસીટીવી કેમેરો પણ તૂટેલો જોવા મળ્યો હતો. જેને લઈને પોલીસને પણ આ મામલે હત્યા કરાઈ હોવાની શંકા જાગી હતી. જેને લઈને રાજકોટ ક્રાઇમબ્રાન્ચ અને એસઓજીના સ્ટાફે તપાસનો ધમધમાટ શરૂ કર્યો હતો અને ગણતરીની કલાકોમાં જ હત્યાનો ભેદ ઉકેલી નાખ્યો હતો. તેમજ મૃતકની ઓળખ મેળવીને આરોપીઓને પણ ઝડપી પાડ્યા હતા.

રાજકોટમાં વૃદ્ધની હત્યા, પોલીસે ગણતરીની કલાકોમાં જ હત્યાનો ભેદ ઉકેલી

પોલીસે આ મામલે તૂટેલા સીસીટીવી કેમેરાના ફૂટેજ ચેક કરતા અલીમહમદ છોટુઅલી સાંઈ નામનો ઈસમ જ્યાં મૃતદેહ મળી તે જગ્યાએ ફરતો નજરે દેખાય છે. જેને લઈને પોલીસે આ ઇસમની અટક કરીને વધુ પૂછપરછ કરતા આ સમગ્ર મામલે પરથી પડદો ઊચકાયો હતો.

પોલીસની પ્રાથમિક તપાસમાં સામે આવ્યું છે કે, મૃતક ગોવિંદ ભાદાભાઈ ચાવડા અલીમહમદની પત્ની નનકીબેગમને કુદરતી હાજતે જતા સમયે છુપાઈને જોતો હોય તેવી શંકા હતી. જેને લઈને અલીમહમદે ગોવિંદ ચાવડાને રાત્રીના સમયે ગળેટૂંપો દઈને તેની હત્યા કરી હતી. તેમજ આ મામલે પત્નીને જાણ કરી બન્ને પતિ પત્નીએ જાણે કંઈ બન્યું ન હોય તેમ મૃતકના મૃતદેહને બારદાનના ઢગલામાં છુપાવી દીધી હતી.

ઉલ્લેખનીય છે કે, મૃતક પણ અહીં આવેલા કારખાનામાં રાત્રી દરમિયાન ચોકીનું કામ કરતા હતા. હાલ પોલીસે પતિ પત્ની બન્ને આરોપીઓની ધરપકડ કરી વધુ કાર્યવાહી હાથધરી છે.