રાજકોટ :દિવાળી બાદ સારા મુહૂર્ત શરૂ થતાં લગ્ન પ્રસંગનો સમય આવતો હોય છે. ત્યારે રાજકોટના યુવાને પોતાના લગ્ન માટે એક અનોખી કંકોત્રીનું નિર્માણ કર્યું છે. આ યુવાને રાજાશાહી સમયમાં જે પત્રિકા કંકોત્રી આવતી હતી તે પ્રકારની કંકોત્રીનું નિર્માણ કર્યું છે. જે 10 ફૂટ લાંબી છે અને ત્રણ ફૂટ પહોળી છે. જ્યારે હાલ આ પ્રકારની કંકોત્રી આકર્ષણનું કેન્દ્ર બની છે.
રજવાડી કંકોત્રી : રાજકોટમાં અનોખી કંકોત્રી બનાવનાર ધર્મેશ કાળાએ મીડિયા સાથેની વાતચીતમાં જણાવ્યું હતું કે, મારા લગ્નની કંકોત્રીની સાઈઝ 10 ફૂટ લાંબી અને 3 ફૂટ પહોળી છે. પહેલાના સમયમાં રાજાશાહી વખતમાં જે પ્રકારે લગ્નની પત્રિકા બનાવવામાં આવતી હતી તે પ્રકારની કંકોત્રીનું નિર્માણ કર્યું છે. જ્યારે આ પ્રકારની અનોખી કંકોત્રી બનાવવા માટે અંદાજે રૂપિયા 7 થી 8 હજારનો ખર્ચો થયો છે. તેમજ આ કંકોત્રી બનાવવા માટે કેનવાસ પેપર અને કલરનો ઉપયોગ કરવામાં આવ્યો છે. આ કંકોત્રી બનાવવા માટે અંદાજિત આઠ દિવસ જેટલો સમય લાગ્યો હતો.
અનોખી કંકોત્રીનું આકર્ષણ : ધર્મેશ વધુમાં જણાવ્યું હતું કે, આ કંકોત્રી આગામી 7 ડિસેમ્બરના રોજ ખુલ્લી મુકવામાં આવનાર છે. ધર્મેશે પોતાના ઘરે જ આ આખી કંકોત્રી તૈયાર કરી છે. જેમાં તેને પોતાના લગ્નની તારીખ સહિત કંકોત્રીમાં જે પ્રકારે લખાણ હોય છે તે તમામ માહિતી લખી છે. હાલમાં આ અનોખી કંકોત્રી રાજકોટમાં ચર્ચાનો વિષય બની છે. ઉલ્લેખનીય છે કે, આ અગાઉ પણ ધર્મેશે પાણીમાં રંગોળી બનાવીને વર્લ્ડ રેકોર્ડ નોંધાવ્યો હતો. ત્યારે હવે તેને આ પ્રકારની અનોખી કંકોત્રી તૈયાર કરી ફરી આકર્ષણ જમાવ્યું છે.
કોણ છે ધર્મેશ કાળા ? ધર્મેશ કાળા નામનો યુવક હાલ રાજકોટમાં એક ખાનગી કંપનીમાં નોકરી કરે છે. જ્યારે તેના પિતા સિક્યુરિટી ગાર્ડ તરીકે નોકરી કરે છે. પરંતુ તેને પોતાના લગ્ન માટે આ અનોખી કંકોત્રી સાથે એક પુસ્તક પણ લખ્યું છે. આ કંકોત્રી લોકો સમક્ષ મૂકવામાં આવશે તે જ દિવસે પુસ્તકનું વિમોચન કરવામાં આવનાર છે. હાલ તો આ પ્રકારની રાજાશાહી વખતની અનોખી કંકોત્રી તૈયાર કરીને ધર્મેશ ચર્ચામાં આવ્યો છે.
વર્લ્ડ રેકોર્ડ હોલ્ડર : ઉલ્લેખનીય છે કે, ધર્મેશ અવનવી વસ્તુઓનો નિર્માણ કરવાનો શોખ ધરાવે છે. જ્યારે આ અગાઉ પણ તેને પાણીમાં રંગોળી તૈયાર કરી હતી અને વર્લ્ડ રેકોર્ડ બનાવ્યો હતો. ત્યારે હવે તેને પોતાના જ લગ્નની અનોખી કંકોત્રી તૈયાર કરી છે.
- Diwali 2023 : 600 બાળકોના ચહેરા પર આવી 'સ્માઈલ', શેર વિથ સ્માઇલ સંસ્થાએ કરી દિવાળીની અનોખી ઉજવણી
- Diwali 2023 : રાજકોટ આંગણે બ્રહ્માંડ ઉતરી આવ્યું, રેસકોર્સ ગ્રાઉન્ડ ખાતે દિવાળી પૂર્વે ભવ્ય આતશબાજી
