પોરબંદરઃ જિલ્લાના રાણાવાવ જરડી સીમ વિસ્તારમાં એક રહેણાંક મકાનમાં પોલિસે રેડ કરતા ઢાળીયામાંથી કુલ કિંમત રૂપિયા 91,080/-નો વિદેશી દારૂનો જથ્થો મળી આવ્યો હતો. પોલીસે આરોપીને ઝડપી મુદ્દામાલ કબ્જે કરી આગળની કાર્યવાહી હાથ ધરી છે.
દારૂ-જુગારની પ્રવૃત્તિ નેસ્તનાબૂદ કરવા ઝૂંબેશનું આયોજન
પોરબંદર જિલ્લામાં દારૂ-જુગારની પ્રવૃત્તિ નેસ્તનાબૂદ કરવા માટે પોલીસ અધિક્ષક ડૉ.રવિ મોહન સૈની દ્વારા આપેલા સૂચના અન્વયે પોરબંદર ગ્રામ્ય વિભાગના નાયબ પોલીસ અધિક્ષક સ્મિત ગોહિલ દ્વારા એક ઝૂંબેશનું આયોજન કરવામાં આવ્યું છે. જે અન્વયે રાણાવાવ પોલીસ સ્ટેશનના પોરબંદર સબ ઈન્સપેક્ટર બી.એસ.ઝાલા તથા વી.આર.ચોસલા તથા સ્ટાફના હેડ કોન્સટેબલ સી.ટી.પટેલ તથા જે.પી.મોઢવાડિયા અને પોલીસ સ્ટાફ પેટ્રોલિંગમાં હતા તે દરમિયાન બાતમીની રાહે હકીકત મળી હતી કે રાણાવાવ જરડી સીમ વિસ્તારમાં રહેતો લખમણ દુદાભાઈ ઓડેદરા પોતાના રહેણાંક મકાનમાં વેચાણ અર્થે ઈન્ગલિશ દારૂનો જથ્થો રાખેલો છે.
રાણાવાવ પોલીસેે રેડ કરી
પોલીસે બાતમી વાળી જગ્યાએ રેડ કરતાં આરોપી ઘરે હાજર હતો, જેને સાથે રાખી ઝડતી કરતા ઢાળીયામાંથી કુલ કિંમત રૂપિયા 91,080/-નો વિદેશી દારૂનો જથ્થો મળી આવતાં આરોપીને ઝડપી પાડી પોરબંદર જિલ્લાની રાણાવાવ પોલીસ દ્વારા ધોરણસરની કાર્યવાહી હાથ ધરવામાં આવેલ છે.
