પોરબંદરમાં બે દિવસમાં છ ખલાસીના મોત, વધુ ત્રણ ખલાસીઓના મૃતદેહ મળી આવ્યાં

પોરબંદરઃ 10 ઓગસ્ટથી પોરબંદર સમુદ્રમાં માછીમારી કરવા ગયેલા 19 નાના પિલાણામાંથી હજુ બે પિલાણા અને તેમાં સવાર દસ ખલાસીઓનો કોઈ સંપર્ક થઇ શક્યો નથી. ગઈ કાલે દરિયામાં ભારે તોફાનના કારણે ગુમ થયેલા પિલાણાનાં વધુ ત્રણ ખલાસીઓના મૃતદેહ ગોસા ટુકડા નજીકના દરિયા કિનારે મળી આવતા માછીમાર સમાજમાં શોકની લાગણી છવાઈ છે.

પોરબંદરના કુલ 19 જેટલા પિલાણા ગઈકાલે નજીકના સમુદ્રમાં માછીમારી માટે ગયા હતા. ભારે વરસાદ અને પવનને કારણે સમુદ્ર તોફાની બનીને ભારે મોજા ઉછળતાં બોટને લંગર નાંખીને માછીમારો દરિયો શાંત થવાની રાહ જોતા હતા, પરંતુ તોફાનની સામે ત્રણ પિલાણા ડૂબી ગયા હતા. તેમજ માછીમારો પૈકી ત્રણ માછીમારો મનીષ લાલજી મસાણી, વસંત ભોવાન ભરાડા અને મુળુ લાખાના મૃતદેહો શનિવારે નવી બંદર નજીકથી મળી આવ્યા હતા. જ્યારે આજે 11 ઓગસ્ટ ના રવિવારે વધુ ત્રણ મૃતદેહો ટુકડા ગોસા નજીકથી મળી આવતા માછીમાર સમાજમાં શોક ફેલાય ગયો હતો.

"આસ્થા" નામના પિલાણાના 55 વર્ષીય લક્ષ્મણ ગાંગા બામણીયા, " જશોદા મૈયા" પિલાણાના બે ખલાસીઓ 50 વર્ષીય રમેશ પ્રેમજી આંજણી રહે વેરાવળ તથા 48 વર્ષીય શંકર નારણ સોલંકી રહે જાફરાબાદ ના મૃતદેહ મળી આવ્યા હતા. આથી માછીમાર સમાજના આગેવાનો સરકારી હોસ્પીટલે દોડી ગયા હતા અને ગુમ થયેલા ખલાસીઓ અને પિલાણાની શોધખોળ માટે કોસ્ટગાર્ડના હેલિકોપ્ટરની પણ મદદ લેવામાં આવી રહી છે. હજુ બે પિલાણા "દીપસાગર "અને "રામેશ્વર" અને તેમાં માછીમારી કરવા ગયેલા 10 જેટલા ખલાસીઓનો સંપર્ક થઇ શક્યો નથી જેથી માછીમારોમાં ચિંતાની લાગણી જોવા મળે છે તો બે દિવસમાં છ ખલાસીઓના દુર્ઘટનામાં મોત થતા માછીમાર સમાજમાં ગમગીની છવાઈ છે.