લ્યો બોલો..! પોરબંદરમાં રૂપિયા 92 કરોડના ખર્ચે તૈયાર થયેલા 2448 આવાસોની હવે થશે ફાળવણી

પોરબંદરમાં રૂપિયા 92 કરોડના ખર્ચે 2448 આવાસો બનાવવામાં આવ્યા છે પરંતુ આ આવાસોની ફાળવણી હજુ સુધી કરવામાં આવી નથી. ત્યારે તંત્રની ઘોર બેદરકારીના કારણે ગરીબ લોકો લાભથી વંચિત રહ્યા છે. ત્યારે પાલિકાના ચીફ ઓફિસરે જણાવ્યું હતું કે, શુક્રવારથી અલગ-અલગ ત્રણ સ્ટેજમાં લોકોને મકાનની ફાળવણી કરવામાં આવશે.

પોરબંદર: શહેરમાં રૂપિયા 92 કરોડના ખર્ચે બનાવવામાં આવેલા આવાસમાં રૂમ, રસોડું, બાથરૂમ સહિતની સુવિધાઓ ઉપલબ્ધ કરવામાં આવી છે. જેમાં પોરબંદરમાં મિશન યોજના અંતર્ગત બોખીરા અને કુછડી ગામની વચ્ચેના રોડ પર શહેરી ગરીબો માટે છેલ્લા ત્રણ વર્ષથી 2448 જેટલા મકાનો રહેણાંક મકાનો તૈયાર કરી દેવામાં આવ્યા છે. તેમજ મધ્યમ વર્ગના લોકોએ આવાસ માટે જરૂરી 5000 રૂપિયા ભરી દીધા હોવા છતાં પણ તેમને હજુ સુધી મકાનોની ફાળવણી કરવામાં આવી નથી. ત્યારે બીજી તરફ સમાજ કલ્યાણ વિભાગે મકાનો જર્જરિત બનતા મકાનના સમારકામ પછી જ ગ્રાન્ટ મંજૂર થશે, તેવું પાલિકાના સત્તાવાળાઓને જણાવી દીધું હતું. જેના કારણે મકાનનું સમારકામ પણ હાથ ધરવામાં આવ્યું હતું.

જ્યારે ગરીબ અને મધ્યમ વર્ગના લોકો જમીન-મકાનના ભાવ ખૂબ જ ઉંચા હોવાના કારણે ઘરનું ઘર લઈ શકતા નથી. ત્યારે કેન્દ્ર સરકારે મંજૂરી આપતા નગરપાલિકાની હદમાં નગર સેવા સદનના સહયોગથી મકાનો તૈયાર કરવામાં આવ્યા હતા. ત્રણ વર્ષ પહેલાં તૈયાર થયેલા રહેણાંક મકાનની ફાળવણી માટેની પાલિકાએ કાર્યવાહી હાથ ધરી હતી. જેમાં ફોર્મનું વિતરણ કરવામાં આવ્યું હતું અને ગરીબોએ ફોર્મ ભરીને જમા કરાવ્યા હતા. પરંતુ હાલ પાલિકા દ્વારા તૈયાર થયેલા આવાસોનું લોકાર્પણ થાય તે પહેલાં જ બિલ્ડિંગ બિસ્માર બની ગયુ છે. જ્યારે આ આવાસો પણ રહેવાલાયક રહ્યા નથી. ત્યારે છેલ્લા ત્રણ વર્ષથી કામ ટલ્લે ચડ્યું હોવાના કારણે હજી સુધી લોકાર્પણ થયું ન હોવાથી ગરીબો પણ વ્યાકુળ બન્યા છે. તેમજ તંત્રની ઘોર બેદરકારીના કારણે ગરીબ લોકો લાભથી વંચિત રહ્યા છે.આ કરોડો રૂપિયાના ખર્ચે તૈયાર કરવામાં આવેલા આવાસોનું લોકાર્પણ કરાઇ તે પહેલાં જ ઇમારત બિસ્માર બની ગઇ છે. તેમજ મોટાભાગનાં સ્થળોએ બારી, બારણા, દરવાજા પણ કટાઈ ગયા છે. તેમજ મકાનો જર્જરિત બનતાં અમુક સ્થળોએ વરસાદી પાણી પણ ટપકી રહ્યા છે. ત્યારે આ બાબતે પાલિકાના ચીફ ઓફિસરે જણાવ્યું હતું કે, આગામી શુક્રવારના રોજથી અલગ-અલગ ત્રણ સ્ટેજમાં લોકોને મકાનની ફાળવણી કરવામાં આવશે. હાલમાં રીનોવેશનની પ્રક્રિયા ચાલતી હતી આથી આ કામ મોડું થયું છે. હવે તે પૂર્ણ થઈ જતા આવાસની ફાળવણી કરવામાં આવશે.