સુજલામ સુફલામ યોજના અંતર્ગત બરડા સાગર ડેમની કેનાલમાં થઇ સફાઈ

પોરબંદરઃ બરડા સાગર ડેમ બરડા વિસ્તારમાં જીવાદોરી સમાન માનવામાં આવે છે, પરંતુ છેલ્લા 5 વર્ષથી તેની સાથે જોડાયેલી કેનાલોની સફાઈ કરવામાં આવતી ન હતી. જેથી આ કેનાલમાં ઝાડી-ઝાંખરા અને વરસાદી પાણીથી પથ્થરો અને માટી પડતી હોવાથી કેનાલ બુરાઈ જાય તેવી પરિસ્થિતિ ઉભી થઈ હતી, પરંતુ અનેક પ્રયાસો બાદ આ કેનાલનો સમાવેશ સુજલામ સુફલામ યોજનામાં કરવામાં આવ્યો હતો. તેથી આ કેનાલનું સફાઈ કામ હાથ ધરાતા ખેડૂતોમાં ખુશીની લાગણી જોવા મળી હતી.

આ કેનાલ પર ચોમાસામાં બગવદર મોઢવાડા રોડ પરથી પાણી પસાર થતું હોવાથી વાહન વ્યવહાર પણ ઠપ્પ થઇ જાય છે. જેથી કેનાલની સાફ સફાઈ કરવી જરૂરી બની હતી. આ બાબતે મોઢવાડા ગામના યુવા સરપંચ જયમલ મોઢવાડીયા અને કેનાલ કાંઠાના લાભાર્થી ખેડૂતોએ ધારાસભ્ય બાબુ બોખીરીયા સહિત કલેક્ટર તેમજ કાર્યપાલક ઈજનેરને પણ કરી હતી.

ધારાસભ્યના પ્રયાસથી સુજલામ સુફલામ યોજનામાં આ કેનાલનો સમાવેશ કરવામાં આવ્યો હોવાથી હાલ આ કેનાલોની સાફ સફાઈનું કામ ચાલુ થતા મોઢવાડા અને કેનાલના કાંઠાના ખેતર ધરાવતા ખેડૂતોમાં ખુશી છવાઈ હતી.