રાધનપુરના નર્સરી વિસ્તારમાં 15 દિવસથી પાણી ભરાયા

રાધનપુરમાં વરસાદનો વિરામ થવા છતાં નગરના વડપાસર તળાવ નજીક આવેલા નર્સરી વિસ્તારમાં ઘૂંટણસમા પાણી ભરાયેલા છે. જેના નિકાલ માટે તંત્ર દ્વારા નક્કર કામગીરી હાથ ધરવામાં નહીં આવતા આ વિસ્તારના પરિવારો પોતાના મકાન છોડીને રસ્તા ઉપર રહેવા મજબૂર બન્યા છે.

પાટણ: રાધનપુરના વડપાસર તળાવને પાણી પહોંચાડતી કેનાલ નજીક આવેલા નર્સરી વિસ્તારમાં 15 દિવસથી પાણી ભરાયેલા છે. જેથી અહીં રહેતા 50 જેટલા પરિવારોને ઘરની બહાર નીકળવું મુશ્કેલ બન્યું છે. આ વિસ્તારમાં ભરાયેલા પાણીના નિકાલની તંત્ર દ્વારા યોગ્ય વ્યવસ્થા કરવામાં નહીં આવતા મોટાભાગના લોકો રસ્તા ઉપર રહેવા મજબૂર બન્યા છે.

વરસાદી પાણી અને તળાવના વધારાના પાણીના નિકાલ માટે ગટરની કામગીરી ગત 5 વર્ષથી ગોકળ ગતિએ ચાલી રહી છે. હજૂ સુધી આ કામગીરી પૂર્ણ કરવામાં આવી નથી. આ ઉપરાંત પાણીના નિકાલ માટે આ વિસ્તારના નગરસેવકે પ્રાંત અધિકારીને રજૂઆત પણ કરી છે, પરંતુ નગરપાલિકાના ચીફ ઓફિસર આ બાબતે આંખ આડા કાન કરતા હોવાનું લાગી રહ્યું છે.