પાટણ જિલ્લા પંચાયતની સામાન્ય સભામાં ભ્રષ્ટાચારનો મુદ્દો ઉછળ્યો

ભાજપ શાસિત પાટણ જિલ્લા પંચાયતની વર્તમાન બોડીની અંતિમ સામાન્ય સભા જિલ્લા પંચાયત પ્રમુખના અધ્યક્ષસ્થાને યોજાઇ હતી. જેમાં વિપક્ષે બાલ સખા યોજના, બાંધકામ અને શિક્ષણ સમિતિમાં મોટા પાયે ભ્રષ્ટાચાર થયા હોવાનો આક્ષેપ કરી યોગ્ય ખુલાસો કરવામાં નહિ આવે તો કાયદાકીય કાર્યવાહી કરવાની ચીમકી આપી હતી.

પાટણઃ જિલ્લા પંચાયતના સ્વર્ણિમ હોલ ખાતે જિલ્લા પંચાયત પ્રમુખ વિનુભાઇ પ્રજાપતિના અધ્યક્ષ સ્થાને મળેલી સામાન્ય સભાની બેઠકમાં સભાના પ્રારંભમાં એજન્ડાના બે ઈશ્યૂ રજૂ કરવા મામલે વિપક્ષના સભ્યોએ વિરોધ નોંધાવી એજન્ડામાં અલગ-અલગ સમયના ફેરફારને ગંભીર ભૂલ ગણાવી હતી. તો શંખેશ્વરમાં પશુ સારવાર માટે ફાળવવામાં આવેલી એમ્બ્યુલન્સ ક્યારથી શરૂ કરવામાં આવી છે અને કેટલાક ગામોનો સમાવેશ કરવામાં આવ્યો છે તે મુદ્દો પણ ઉઠ્યો હતો.

વિપક્ષે જિલ્લા પંચાયતમાં સ્વભંડોળના સત્તાધીશો દ્વારા આડે ધડ વાવડી ખોટા ખર્ચ કર્યા હોવાનો આક્ષેપ કર્યો હતો. તેમ જ ચાર્જમાં રહેલા કર્મચારીઓ અધિકારીઓ નિયમિત રીતે ફરજ બજાવતા નહીં હોવાની રજૂઆત પણ કરી હતી. શિક્ષકોએ ઉચ્ચતર પગાર ધોરણ માટે ત્રિપલ સી ના પ્રમાણપત્રો ગેરકાયદેસર રીતે કઢાવી શિક્ષણ સમિતિમાં રજૂ કરી મોટા પ્રમાણમાં ભ્રષ્ટાચાર આચરવામાં આવ્યો હોવાનો પણ આક્ષેપ કર્યો હતો. તેમજ જીલ્લા પંચાયતમાં ચાલતી બાલ સખા યોજનામાં પણ બાળકોને સાત દિવસ સારવાર આપવાની હોય છે તે પણ એક બે દિવસ ડોકટરોએ સારવાર આપી કાગળ ઉપર સાત દિવસ બતાવી લાખો રૂપિયાની ખાયકી કરવામાં આવી છે.

જિલ્લા પંચાયત અને તાલુકા પંચાયતના વર્ગ-3 અને 4ના કર્મચારીઓમાંથી કોઈનું આકસ્મિક મૃત્યુ થાય તો તેવા કિસ્સામાં તેમના પરિવારજનોને મદદરૂપ બનવા સ્વભંડોળમાંથી રૂપિયા એક લાખની સહાય ચૂકવવાની જાહેરાત કરવામાં આવી હતી. આ ઉપરાંત ફરજ બજાવનાર કોરોના વોરીયર્સ એવા આરોગ્ય કર્મચારીઓનું સન્માન કરવામાં આવ્યું હતું. સામાન્ય સભામાં સ્ટેમ્પ ડ્યૂટીના રૂપિયા પાંચ કરોડ મળી કુલ 9 કરોડની ગ્રાન્ટ વિકાસ કામો માટે ફાળવવામાં આવી હતી.3 ચુસ્ત પોલીસ બંદોબસ્ત સાથે યોજાયેલી ભાજપ શાસિત પાટણ જિલ્લા પંચાયતની અંતિમ સામાન્ય ભ્રષ્ટાચારના આક્ષેપો સાથે સંપન્ન થઈ હતી.