પાટણમાં રિક્ષા ચાલકોએ કોરોના ફ્રી પ્રમાણપત્ર મેળવવા લાઈનો લગાવી

પાટણ શહેરના રિક્ષા ચાલકો દ્વારા કોરોના વાયરસનુ સંક્રમણ ન ફેલાય તે માટે પ્રાંત અધિકારીએ રિક્ષા ચાલકોના સ્વાસ્થ્યની ચકાસણી કરી તેઓને કોવિડ -19 સીમત સિમ્પટમ્પ ફ્રી પ્રમાણ પત્ર મેળવી રીક્ષા પર ચોંટાડવાનું જાહેરનામું બહાર પાડ્યું છે. જેને કારણે રીક્ષા ચાલકો આ પ્રમાણ પત્ર મેળવવા અર્બન હેલ્થ સેન્ટરો પર મોટી સંખ્યામાં ઉમટી પડતા સોશિયલ ડિસ્ટન્સના લીરેલીરા ઉડતા દ્રશ્યો જોવા મળ્યા હતા.

પાટણઃ લોકડાઉન 3 દરમિયાન વેપારીઓને સવારે 7થી સાંજના 7 વાગ્યા સુધી વેપાર ધંધો કરવાની છૂટ આપી છે. પણ રીક્ષા ચાલકોને પરિવહન કરવાની મંજૂરી આપી ન હતી. ત્યારે પાટણ પ્રાંત અધિકારી સ્વપ્નિલ ખરે રિક્ષાચાલકો માટે જાહેરનામુ બહાર પાડ્યું છે. જેમાં રીક્ષા ચાલકોથી મુસાફરોમાં સંક્રમણ ન ફેલાય તે માટે રીક્ષા ચાલકોએ કોવિડ-19 સિમ્પટમ્પ ફ્રી પ્રમાણપત્ર મેળવવાનું ફરજીયાત બનાવ્યું છે. સાથે-સાથે મુસાફર અને રીક્ષા ચાલક વચ્ચે અંતર જળવાઈ રહે તે માટે રીક્ષામાં પડદા લગાવવા ફરજીયાત કર્યા છે. રીક્ષા ચાલકો માટે વહીવટી તંત્ર દ્વારા શહેરમાં અલગ- અલગ ત્રણ સ્થળો નક્કી કર્યા છે. આ જાહેરનામુ 18 મેંથી અમલી બનશે તેથી રીક્ષા ચાલકો મામલતદાર કચેરી ખાતે અર્બન હેલ્થ સેન્ટરમાં લાંબી કતારોમાં પ્રમાણ પત્ર લેવા ઉભા રહ્યા હતા.

કોરોના વાયરસના સંક્રમણને ફેલાતો અટકાવવા માટે સરકાર અને વહીવટી તંત્ર દ્વારા સોશિયલ ડિસ્ટન્સ, ફરજીયાત માસ્ક તેમજ સેનેટાઈઝેશન સહિતના નિયમો અમલી કર્યા છે. આ નિયમોનું ઉલંઘન કરનાર સામે દંડનીય કાર્યવાહી કરવામાં આવે છે. શહેરમાં દુકાનો આગળ ભીડ થાય તો વહીવટી તંત્ર અને પોલિસ વિભાગ દ્વારા વેપારીઓ અને પ્રજાજનો સામે દંડનીય કાર્યવાહી કરવામાં આવે છે. ત્યારે બીજી તરફ સરકારી કચેરીમાં જ પ્રાંત અધિકારીના જાહેરનામનુ સરેઆમ ઉલંઘન થઈ રહ્યુ છે.રિક્ષા ચાલકોને સ્વાસ્થ્યની ચકાસણી માટે નક્કી કરાયેલા ત્રણ અર્બન હેલ્થ સેન્ટર પર વહેલી સવારથીજ રીક્ષા ચાલકોની લાંબી કતારો સર્જાય હતી આ સેન્ટરો ઉપરથી સવારે 9થી બપોરના 12 વાગ્યા સુધીના સમયમાં હેલ્થકાર્ડ આપવામાં આવે છે. જેથી બપોર બાદ રીક્ષા ચાલકોને પાછા જવું પડે છે. વહીવટી તંત્ર દ્વારા હેલ્થ કાર્ડ આપવાના સમયમા વધારો કરવામાં આવે તેવી માગ ઉઠવા પામી છે.પાટણ શહેરમાં વેપારીઓ અને શહેરીજનો સામે તંત્ર દ્વારા દંડનીય કાર્યવાહી કરવામાં આવે છે. જ્યારે સરકારી કચેરીઓમાં જ કોઈ નિયમોનું પાલન કરવામાં આવતું નથી. અર્બન હેલ્થ સેન્ટરો ઉપર હેલ્થકાર્ડ મેળવવા આવનારા રિક્ષા ચાલકો માટે કોઈ જ પ્રકારની યોગ્ય વ્યવસ્થા કરવામાં ન આવતા લાંબી કતારો સર્જાઈ હતી.