પાટણ જિલ્લામાં અત્યાર સુધીમાં નોંધાયો 48 ટકા વરસાદ

પાટણ પંથકમાં શ્રાવણ માસની પૂર્ણાહૂતિ સમયે સોમવારે સાંજે જોરદાર વરસાદી ઝાપટાં પડ્યા બાદ રાત્રે અને મંગળવારે બપોર સુધીમાં ભાદરવાનો તીખો તડકો પડતા લોકો ગરમી અને અસહ્ય ઉકળાટથી અકળાયા હતા. પાટણ, હારીજ અને સરસ્વતી પંથકમાં ગત રોજ વરસાદ પડ્યા બાદ મંગળવાર બપોર સુધી તમામ તાલુકાઓમાં વરસાદ પડ્યો હતો. પાટણ જિલ્લામાં અત્યાર સુધીમાં 48 ટકા વરસાદ નોંધાયો છે.

• પાટણમાં સોમવારે સાંજે વરસાદી માહોલ વચ્ચે વરસાદી ઝાપટા પડ્યા
• સોમવારે સાંજે પાટણ હારીજ અને સરસ્વતી તાલુકાઓમાં વરસાદી ઝાપટા પડ્યા
• ધોધમાર વરસાદની લોકોની આશાઓ પર પાણી ફરી વળ્યું
• ભાદરવાના તડકાથી લોકો પરેશાન થયા

પાટણ: સમગ્ર રાજ્યમાં ભારે વરસાદની આગાહીને પગલે પાટણ પંથકમાં સોમવારે સાંજે આકાશમાં કાળા ડિબાંગ વાદળો ધસી આવ્યા હતા અને જોતજોતામાં ચારેય બાજુ ફેલાઈ જતા ધોધમાર વરસાદ પડશે તેવું વાતાવરણ સર્જાયું હતું. જોકે જોરદાર વરસાદી ઝાપટાં પડ્યા બાદ વાદળો વિખેરાઇ ગયા હતા અને વરસાદે વિરામ લીધો હતો. મંગળવારે સવારથી જ આકાશ સ્વચ્છ બન્યું હતું અને ભાદરવાના પ્રથમ દિવસે સૂર્ય અસહ્ય ગરમી અને ઉકળાટથી લોકો પરસેવે રેબઝેબ બન્યા હતા. પાટણ પંચાયતમાં સોમવારે રાત્રે પડેલા વરસાદી ઝાપટાં પાટણ તાલુકામાં 8 mm, સરસ્વતી તાલુકામાં 18 mm અને હારીજ તાલુકામાં 37 mm વરસાદ નોંધાયો હતો. જ્યારે અન્ય તાલુકાઓમાં વરસાદ ઓછો નોંધાયો હતો.

પાટણ જિલ્લામાં અત્યાર સુધી 48.74 ટકા વરસાદ નોંધાયો

સમગ્ર જિલ્લામાં વરસાદી આંકડામાં ઉપર નજર કરીએ તો પાટણ તાલુકામાં 336 mm, ચાણસ્મા તાલુકામાં 271 mm, સિદ્ધપુર તાલુકામાં 419 mm, સરસ્વતી તાલુકામાં 440 mm, હારિજ તાલુકામાં 272 mm, સમી તાલુકામાં 199 mm, શંખેશ્વર તાલુકામાં 268 mm, રાધનપુર તાલુકામાં 327 mm અને સાંતલપુર તાલુકામાં 87 mm વરસાદ થયો છે. પાટણ જિલ્લામાં 597 mm વરસાદની જરૂરિયાત સામે ચાલુ વર્ષે 291 mm વરસાદ એટલે 48.71 ટકા વરસાદ અત્યાર સુધીમાં થયો છે. જ્યારે 51.26 ટકાની વરસાદની હજી ઘટ છે. અત્યાર સુધીમાં સૌથી વધુ વરસાદ સરસ્વતી તાલુકામાં 440 mm અને સૌથી ઓછો વરસાદ સાંતલપુર તાલુકામાં 87 mm થયો છે.