પાટણની આર્ટ્સ કોલેજમાં અભ્યાસલક્ષી એન્ડ્રોઈડ મોબાઈલ એપ્લિકેશન શરૂ કરાઈ

પાટણઃ આજનો વિદ્યાર્થી ડિજિટલ ટેકનોલોજીનો ઉપયોગ કરી શકે તે માટે પાટણની શ્રીમતી પી.કે. કોટવાલા આર્ટ્સ કોલેજ દ્વારા એન્ડ્રોઈડ મોબાઈલ એપ્લિકેશન લોન્ચ કરવામાં આવી છે. આ એપથી વિદ્યાર્થીઓ અભ્યાસલક્ષી માહિત સરળતાથી મેળવી શકશે.

વિશ્વ ઝડપથી ટેકનોલોજી તરફ આગળ વધી રહ્યુ છે, રોજ-બરોજ નવા આયામો આવે છે. હરિફાઇના યુગમાં વિદ્યાર્થીઓ ટકી શકે તે માટે પુસ્તક ના જ્ઞાનને ટેકનોલોજી તરફ આગળ વધારવા એક નવતર પ્રયોગ પાટણની આર્ટ્સ કોલેજે હાથ ધર્યો છે. આર્ટ્સ કોલેજ દ્વારા તૈયાર કરાયેલ એન્ડ્રોઈડ મોબાઈલ એપને સંસ્થાના સેક્રેટરી યામિની બેન દેસાઈની ઉપસ્થિતિમાં લોન્ચ કરવામાં આવી હતી. આ એપથી કોલેજના વિદ્યાર્થીઓને વિવિધ વિષયોનું મટીરીયલ ઘેર બેઠા મળી રહેશે, તેમજ સ્પર્ધાત્મક પરીક્ષાઓની માહિતી અને મટીરીયલ પણ વિદ્યાર્થીઓને મળી રહેશે. તદઉપરાંત આ એપ્લિકેશનમાં વિદ્યાર્થીઓ લક્ષી સરકારની યોજનાઓનો સમાવેશ પણ કરવામાં આવ્યો છે. જેથી આ એપ આર્ટ્સ કોલેજ પાટણના વિદ્યાર્થીઓ માટે ફાયદારૂપ સાબિત થશે.

વર્તમાન સમયમાં વિદ્યાર્થીઓની ભીડ પુસ્તકાલય તરફ ઓછી અને મોબાઈલ તરફ વધી રહી છે, ત્યારે સમગ્ર અભ્યાસક્રમનું મટીરીયલ સોફ્ટ કરીને આ એપ તૈયાર કરવામાં આવી છે. જેથી વિદ્યાર્થીઓ સરળતાથી વિવિધ માહિતીઓ મેળવી શકશે.