Published : Oct 22, 2023, 12:35 PM IST
પાટણ:શહેરના સલવિવાડા વિસ્તારમાં આવેલ લીંબચમતાની પોળમા લીંબચ માતાનું પ્રાચીન મંદિર આવેલું છે. અહીં નવરાત્રી મંડળ દ્વારા નવરાત્રી મહોત્સવનું સુંદર આયોજન કરવામાં આવ્યું છે. નવરાત્રીના સાત દિવસ અહી જૂની પરંપરા અનુસાર અહીંના રહેવાશીઓ ગરબે ઘૂમીને માતાજીની આરાધના કરે છે. નવરાત્રિની સાતમે મંદિર ખાતે વિવિધ કાર્યક્રમોનું આયોજન કરવામાં આવ્યું હતું.ખેલૈયાઓએ વિવિધ ટ્રેડિશનલ પોષાકમાં સજ્જ થઈને માતાજીના ગરબે ઘૂમી માતાજીની આરાધના કરી હતી.
આધ્યશક્તિની આરાધના: ખાસ તો નવદુર્ગાના ગરબાનું તેમજ મહાકાળીના ગરબાનું વિશેષ આયોજન કરાયું હતું. જેમાં નવ દુર્ગાના ગરબામા યુવતીઓ માતાજીના વેશમાં ગરબે ઘૂમતા અલૌકિક વાતાવરણ સર્જાયું હતું અને જાણે સાક્ષાત નવદુર્ગા ચાચર ચોકમાં ગરબે રમવા આવ્યા હોય તેવી ભાવ લોકોએ અનુભવ્યો હતો. આ અનુપમ દ્રશ્યોનો લ્હાવો લેવા માટે મોટી સંખ્યામાં લોકો ઉમટી પડ્યા હતાં અને પરંપરાગત મહાકાળી માતાના ગરબાની આરાધના કરી હતી. ખાસ તો આ તકે યુવતીઓએ કાળકા ભદ્રકાળી અને પતાઈરાજાના પાત્રો ભજવી તાલબદ્ધ રીતે ગરબાની રંગત જમાવી હતી. ત્યાર બાદ માં લીંબચની નવખંડની પલ્લી ભરવામાં આવી હતી. ત્યારે હજો.....હજો….. ના નાદથી સમગ્ર મંદિર પરિસરનું વાતાવરણ ગુંજી ઉઠ્યું હતું.
લીંબચની માતાની પલ્લી: લીંબચ માતાની પોળમાં દર વર્ષે પરંપરાગત રીતે સાતમની ઉજવણી કરવામાં આવે છે. ખાસ કરીને મહાકાળીનો પ્રાચીન ગરબો પણ યોજવામાં આવે છે, આ ગરબાને જોવા માટે લીંબાચીયા જ્ઞાતિ સમાજના લોકો ઉપરાંત અન્ય સમાજના લોકો પણ બહાર ગામથી પણ આવે છે. ત્યારે આ વર્ષે પણ મોટી સંખ્યામાં લોકો ઉમટી પડ્યા હતા. દર વર્ષે સાતમની રાત્રે માતાજીની નવખંડની પલ્લી ભરવામાં આવે છે, જેના દર્શન માટે મોટી સંખ્યામાં માઇ ભકતો આવે છે, ત્યારે આ વર્ષે પણ પલ્લીના દર્શન માટે મોટી સંખ્યામાં લોકોએ ઉપસ્થિત રહીને પલ્લીના દર્શન કર્યા હતા.
