રાધનપુરના અરજણસર ગામે નજીવી બાબતે યુવાનની હત્યા

રાધનપુર તાલુકાના અરજણસર ગામમાં 18 માર્ચની સાંજે ડેરીમાં દૂધ ભરાવી બાઈક પર ઘર તરફ આવતા યુવાનને ગામના 4 જેટલા શખ્સોએ રોકીને અમારા ઘર પાસે કેમ હોર્ન વગાડે છે, તેમ કહીને હથિયારોથી જીવલેણ હુમલો કર્યો હતો. આ ઘટનામાં ઈજાગ્રસ્ત યુવકને સારવાર અર્થે રાધનપુર લાવવામાં આવ્યો હતો. જ્યાં સારવાર દરમિયાન યુવકનું મોત થયું હતું. આ ઘટનાની જાણ થતા રાધનપુર પોલીસે અરજણસર ગામમાં ચુસ્તક બંદોબસ્ત ગોઠવ્યો હતો. આ ઘટના બાબતે મૃતક યુવકના કાકાએ રાધનપુર પોલીસ મથકમાં ચાર શખ્સો વિરુદ્ધ ફરિયાદ નોંધાવી હતી.

• અરજણસર ગામમાં નજીવી બાબતે યુવકની કરી હત્યા
• દૂધ ભરાવીને ઘરે પરત જઇ રહેલા યુવક પર ચાર શખ્સોએ કર્યો હુમલો
• યુવકના મોતને લઇ પરિવારજનોમાં છવાયો શોક

પાટણ : જિલ્લાના રાધનપુર તાલુકાના અરજણસર ગામે રમેશ ઉર્ફે હરખા ગોવિદજી ઠાકોર 18 માર્ચની સાંજે સાત કલાકે ડેરીમાં દૂધ ભરાવીને પરત ઘરે જઈ રહ્યો હતો. તે દરમિયાન ગામના હરખાજી વિરમજી, નારણજી વિરમજી, બાબાજી ગગાજી અને દેવસીજી ગગાજી ઠાકોરે યુવકને રોક્યો હતો અને રોજ અમારા ઘર પાસેથી નીકળે ત્યારે જોર-જોરથી હોન કેમ વગાડે છે, તેમ કહી ગાળો બોલી લાકડી અને લોખંડની પાઇપ વડે હુમલો કરી ઈજાઓ પહોંચાડી હતી. આ ઝઘડા દરમિયાન સ્થાનિકોએ વચ્ચે પડી યુવાનને છોડાવીને સારવાર અર્થે રાધનપુર ખસેડાયો હતો. જ્યાં સારવાર દરમિયાન યુવકનું મોત થતા પરિવારજનોમાં શોક છવાયો હતો.

આ પણ વાંચો -પાટણઃ વારાહીમાં પતીએ કરી પત્નીની હત્યા

મૃતક યુવકના કાકાએ ચાર શખ્સો સામે નોંધાવી ફરિયાદ

અરજણસર ગામમાં બનેલી ઘટનાની જાણ પોલીસને થતા પોલીસે ગામમાં ચુસ્ત બંદોબસ્ત ગોઠવ્યો છે. આ ઘટના અંગે મૃતક યુવકના કાકાએ ચાર શખ્સો સામે રાધનપુર પોલીસ મથકે ફરિયાદ નોંધાવતા પોલીસે હત્યાનો ગુનો નોંધી તપાસ હાથ ધરી છે.

આ પણ વાંચો -પાટણના હારીજમાં પ્રેમ સંબંધમાં પ્રેમિકાની હાજરીમાં જ પ્રેમીની હત્યા