ગુર્જર નરેશ સિદ્ધરાજ જયસિંહ સ્થાપિત પ્રાચીન નગરી પાટણના નગર દેવી માં કાલિકાના ઐતિહાસિક મંદિર ખાતે ધામધૂમ પૂર્વક દુર્ગાષ્ટિમીની પૂજા વિધિ કરવામાં આવી હતી. 800 વર્ષથી પણ વધુ પ્રાચીન કિલ્લામાંથી સ્વયંભૂ પ્રગટ થયેલ કાલિકા માતાને પાટાણના નગર દેવી માનવામાં આવે છે. વર્ષોથી દુર્ગાષ્ટિમીના રોજ માતાજીની પાલખી યાત્રા નગરમાં નીકળવામાં આવે છે. જેથી હાલમાં ચાલતા નવરાત્રી પર્વમાં દુર્ગાષ્ટમીના દિવસે ધામધૂમ પૂર્વક નગર દેવીની પાલખી યાત્રા નીકળી હતી. આ યાત્રાને પોલીસ દ્વારા ગાર્ડ ઓફ ઓનર આપવામાં આવ્યું હતું. આ પ્રસંગે જિલ્લા કલેકટર, પોલીસ અધિક્ષક, સહિતના અધિકારીઓ પણ મંદિરમાં ઉપસ્થિત રહ્યા હતા. પાલખી યાત્રામાં ઉત્સાહ સાથે જોડાયા હતા.
નગર દેવી માં કાલિકા ને ગાર્ડ ઓફ ઓનર અપાયુ નવરાત્રી પર્વએ જગત જનનીનું પર્વ કહેવાય છે. શાસ્ત્રોમાં કહેવાયા મુજબ માં કાલિકાને લક્ષ્મીજીના મોટા બહેન કહેવાયા છે. એટલે પાટણમાં સદીઓથી ચાલી આવતી પરંપરા મુંજબ દુર્ગાષ્ટમીના દિવસે મોટા બહેન નાની બહેનને મળવા સ્વયં પાલખી બિરાજમાન થઈ નગરમાં નીકળે છે. જે પરંપરા આજે પણ અહીંયા અકબંધ રહેવા પામી છે. માતાજીની પાલખી શહેરના વિવિધ વિસ્તારોમાં થઇ મહાલક્ષ્મી મંદિરે પહોંચી હતી. જ્યાં બંને બહેનોનો સંગમ થતા મોટી સાંખ્યમાં દર્શનાર્થે આવેલા ભક્તોના અનેરો ઉત્સાહ અને ઉલ્લાસ જોવા મળ્યો હતો.
આજની નવી પેઢી પણ આપણી સંસ્કૃતિ અને ઐતિહાસિક ધરોહર જાળવી રાખે તે માટે આવા ઉત્સવો અને કાર્યક્રમો જરૂરી છે. અને જિલ્લા વહીવટી તંત્ર પણ આ કાર્યમાં પૂરેપૂરો સહયોગ આપશે. તેમ જિલ્લા કલેકટર આનંદ પટેલે જણાવ્યું હતું.
