પાટણ જિલ્લા કલેક્ટરે કચેરીમાં અગ્નિશામક યંત્રોને કર્યા કાર્યરત

પાટણ: હાલ સુરતમાં આગની ઘટના બની છે. ત્યારે સમગ્ર તંત્ર પોતાની સેફ્ટીને લઈને સક્રિય થયું છે. ત્યારે પાટણ જિલ્લા કલેકટર કચેરીને ફાયર સેફ્ટીની સુવિધાથી સજ્જ કરવામાં આવી છે. કચેરીની વિવિધ શાખાઓમાં અગ્નિશામકની નવીન બોટલો લગાવી કચેરીની સુરક્ષામાં વધારો કરાયો છે.

સુરતમાં બનેલી આગની ઘટના બાદ પાટણ જિલ્લા વહીવટી તંત્ર પણ સજાગ બન્યું છે. જિલ્લા કલેકટર આનંદ પટેલના આદેશથી ગ્રાન્ડફ્લોરથી લઈને બીજા માળ સુધીની વિવિધ શાખાઓમાં ફાયર સેફ્ટીની નવીન બોટલો લગાવી કચેરીની સુવિધામાં વધારો કરાયો છે. આની પહેલા પણ 10 જેટલી ફાયરસેફટીની બોટલો લગાવી હતી. જો કે, કચેરીને વધુ સુરક્ષિત બનાવવા 17 જેટલી અગ્નિશામક યંત્રોની બોટલો લગાવવામાં આવી છે.

આ ઉપરાંત કલેકટર કચેરીના તાબા હેઠળની પ્રાંત તેમજ મામલતદાર કચેરીઓમાં પણ 12 ફાયર સેફટીના સેટ ફાળવવામાં આવ્યા છે. તેમજ આગામી દિવસોમા સુરક્ષા માટે કર્મચારીઓને તાલીમ પણ આપવામાં આવશે.