પાટણમાં છેલ્લા 2 દિવસથી વરસાદ વરસી રહ્યો છે, 8 તાલુકામાં સાર્વત્રિક વરસાદ

અરબી સમુદ્રમાં સર્જાયેલા સાયક્લોન (cyclone)ની સીધી અસર પાટણ જિલ્લામાં વર્તાઈ રહી છે. જિલ્લામાં છેલ્લા 2 દિવસથી વાતાવરણમાં પલટો આવ્યો છે. ત્યારે અહીં સવારથી જ વરસાદી માહોલ સર્જાયો છે. વીજળીના કડાકા અને ધોધમાર વરસાદી ઝાપટા પડતા ઠેરઠેર જળબંબાકારની સ્થિતિ સર્જાઈ હતી. વરસાદને પગલે વાતાવરણમાં ઠંડક પ્રસરતા લોકોએ ગરમી અને બફારાથી રાહત અનુભવી છે તો શહેરના નીચાણવાળા વિસ્તારોમાં પાણી ભરાયા હતા.

• પાટણમાં ગાજવીજ સાથે વરસાદ વરસી રહ્યો છે
• શહેરના માર્ગો ઉપર વરસાદી પાણી રેલાયા
• નીચાણવાળા વિસ્તારોમાં ભરાયા પાણી
• જિલ્લાના 8 તાલુકાઓમાં સાર્વત્રિક વરસાદ

પાટણઃ જિલ્લામાં સતત બીજા દિવસે પણ સવારથી જ એકાએક વાતાવરણમાં પલટો આવ્યો હતો અને આકાશમાં કાળાડિબાંગ વાદળો ધસી આવ્યા હતા. જિલ્લામાં જોતજોતામાં મેઘગર્જના સાથે ધોધમાર વરસાદી ઝાપટું પડ્યું હતું. ત્યારબાદ ધીમી ધારે વરસાદ વરસતા શહેરના વિવિધ માર્ગો પાણીમાં ધોવાઈ ગયા હતા.

નીચાણવાળા વિસ્તારોમાં પાણી ભરાતા લોકોને હાલાકી

જિલ્લાના જલારામ મંદિર રોડ, રાજમહેલ રોડ, બુકડી, કાલિબજાર, સલવિવાડા, રેલવે ગરનાળુ સહિતના નીચાણવાળા વિસ્તારોમાં પાણી ભરાતા રાહદારીઓ અને વિસ્તારના લોકોને મુશ્કેલીઓ વેઠવી પડી હતી. આકાશમાં વાદળો સર્જાયા દિવસ દરમિયાન ચારે તરફ અંધારું જ જોવા મળ્યું હતું. આ સાથે જ વાહનચાલકોને તકલીફ પડતા હેડલાઈટ ચાલુ કરવાની ફરજ પડી હતી. પાટણ જિલ્લાના 8 તાલુકાઓમાં અડધા ઈંચ જેટલો વરસાદ નોંધાયો હતો.

ક્યાં કેટલો વરસાદ પડ્યો?

જિલ્લામાં સવારથી સાંજે 5:30 વાગ્યા સુધીમાં નોંધાયેલા વરસાદના આંકડા પર નજર કરીએ તો, પાટણ તાલુકામાં 15 mm, સિદ્ધપુર તાલુકામાં 5 mm, સરસ્વતી તાલુકામાં 8 mm, ચાણસ્મા તાલુકામાં 7 mm, સમી તાલુકામાં 4 mm, શંખેશ્વરમાં 16 mm, હરિજમાં 8 mm, સાંતાલપુરમાં 8 mm વરસાદ નોંધાયો હતો. જ્યારે રાધનપુર તાલુકો કોરો રહ્યો હતો.

આ પણ વાંચો-ગુલાબ વાવાઝોડની અસર : ગીર સોમનાથના 6 તાલુકામાં સાર્વત્રીક વરસાદ, નદીઓમાં આવ્યા ઘોડાપુર

આ પણ વાંચો-ડીસા તાલુકામાં પડેલા ભારે વરસાદથી ચોમાસું પાક નષ્ટ, સરકાર પાસે સહાયની માંગ