રાધનપુર પેટાચૂંટણીમાં ઉમેદવારોએ ભર્યા ફોર્મ, ભાજપ-કોંગ્રસ સામ-સામે

રાધનપુરઃ પેટા ચૂંટણી જાહેર થતા ફોર્મ ભરવાના અંતિમ દિવસે પ્રાંત કચેરી ખાતે ઉમેદવારોનો ભારે ઘસારો જોવા મળ્યો હતો. ભાજપ અને કોંગ્રસ, NCP અને ડમી સહિત 19 ઉમેદવારોએ ફોર્મ ભરી ચૂંટણીમાં પોતાની ઉમેદવારી નોંધાવી હતી.

પાટણ જિલ્લાની રાધનપુર વિધાનસભા બેઠકની અલ્પેશ ઠાકોરના રાજીનામાના કારણે અને ત્યાર બાદ કોંગ્રેસમાંથી છેડો ફાડી અલ્પેશ ઠાકોર ભાજપમાં જોડાતા રાધનપુર વિધાન સભાની બેઠક ખાલી પડી હતી, ત્યારે આ ખાલી બેઠક ભરવા માટે ચૂંટણી પંચ દ્રારા પેટા ચૂંટણી જાહેર કરવામા આવતા અને સોમવારે ફોર્મ ભરવાના છેલ્લા દિવસે પ્રાંત કચેરી રાધનપુર ખાતે ઉમેદવારોનો ભારે ઘસારો જોવા મળ્યો હતો. દરેક પક્ષના ઉમેદવારો પોતાના ટેકેદારો સાથે પ્રાંત કચેરીએ આવી ફોર્મ ભર્યા હતા.

ભાજપમાંથી અલ્પેશ ઠાકોરે ઉમેદવારી નોંધાવી હતી. પ્રદેશ અધ્યક્ષ જીતુભાઇ વાઘાણી પૂર્વ ધારાસભ્ય નાગરજી ઠાકોર, પ્રદેશ મહામંત્રી કે.સી.પટેલ, બળવંતસિંહ રાજપૂત, વાસણભાઈ આહીર સહિત ભાજપના આગેવાનો ઉપસ્થિત રહ્યાં હતાં. રાધનપુર પેટા ચૂંટણી કોંગ્રેસ પક્ષે રઘૂભાઇ દેસાઈને ટિકિટ આપતા તેમણે પણ પોતાના ટેકેદારો સાથે ફોર્મ ભરી ચૂંટણી જંગમાં ઝંપલાવ્યુ હતું. આમ રાધનપુર મત વિસ્તારની પેટા ચૂંટણીમાં ભાજપ, કોગ્રેસ, NCP, અપક્ષ અને ડમી સહિત 19 ઉમેદવારોએ ઉમેદવારી નોંધાવી છે, ત્યારે ચૂંટણી જંગ રસપ્રદ બને તેમ હવે લાગી રહ્યું છે.