પાટણ જિલ્લાની આશા વર્કર્સે સરકાર સામે બાયો ચડાવી

આંતરરાષ્ટ્રીય મહિલા દિવસ નિમિત્તે પાટણ જિલ્લાની આશા વર્કર બહેનોએ સરકાર સામે મોરચો માંડયો હતો. સમાન કામ સમાન વેતન લઘુતમ વેતન ચૂકવવા અને આઉટ સોર્સિંગ પદ્ધતિ બંધ કરીને મહિલાઓનું શોષણ અટકાવવા માગ કરી છે. આ સાથે 8 મુદ્દાઓ સાથે રાષ્ટ્રપતિને ઉદ્દેશીને કલેક્ટર કચેરી ખાતે ચીટનીશ ટૂ કલેકટરને આવેદન પત્ર આપ્યું હતું.

• પાટણમાં આશા વર્કર્સએ નોંધાવ્યો વિરોધ
• કલેકટર કચેરીએ કાળી પટ્ટી ધારણ કરીને સરકારની નીતિ સામે કર્યો વિરોધ
• આઉટ સોર્સિંંગ પદ્ધતિ બંધ કરીને મહિલાઓનું શોષણ અટકાવવા કરી માગ

પાટણ : જિલ્લા સહિત રાજ્યમાં આશા વર્કર તરીકે ફરજ બજાવતી મહિલાઓને કામના પ્રમાણમાં ઓછું વેતન ચૂકવી સરકાર દ્વારા શોષણ કરવામાં આવે છે. આ નીતિના વિરોધમાં સોમવારે આંતરરાષ્ટ્રીય મહિલા દિવસ નિમિત્તે વિરોધ પ્રદર્શન કરવા પાટણ જિલ્લાની આશા વર્કર બહેનોએ કાળી પટ્ટી ધારણ કરી એકત્ર થઈ હતી.

આઉટ સોર્સિંંગ પદ્ધતિ બંધ કરીને મહિલાઓનું શોષણ અટકાવવા કરી માગ

આશાવર્કર્સ દ્વારા કરવામાં આવેલી 8 માગ

• આશા વર્કર અને આશા ફેસિલિટેટર બહેનો માટે વર્ગ 4નું રેગ્યુલર મહેકમ ઉભુ કરી કાયમી કર્મચારી ગણવા
• લઘુત્તમ વેતન ચૂકવવું
• 180 દિવસ મેટરનિટિ લીવ આપવી
• ઉંમરના બાધ વિના પેન્શન યોજનાનો લાભ આપવો
• મેડીકલ વીમો આપવા
• ઓળખ કાર્ડ આપવા
• યુનિફોર્મ આપવા
• કોરોના કાળમાં કરેલી કામગીરીનું મહેનતાણું ચૂકવવું
• ચૂંટણી પ્રક્રિયા દરમિયાન કરેલી કામગીરીનું મહેનતાણું ચૂકવવું
  

  કલેકટર કચેરીએ કાળી પટ્ટી ધારણ કરીને સરકારની નીતિ સામે કર્યો વિરોધ

કોરોના કાળમાં કરેલી કામગીરીનું મહેનતાણું ચૂકવવામાં સરકાર નિષ્ફળ

ગત એક વર્ષથી કોરોના મહામારીમાં આશાવર્કર બહેનો દ્વારા મહત્વની કામગીરી કરવામાં આવી રહી છે, પરંતુ કોરોનાના કપરા કાળ દરમિયાન પણ આશાવર્કર્સે કરેલી કામગીરીનું મહેનતાણું ચૂકવવામાં સરકાર નિષ્ફળ રહી છે. માત્ર શરૂઆતના 3 મહિનાનું 1,000 લેખે મહેનતાણું ચૂકવવામાં આવ્યું છે. જે બાદ આજદિન સુધી આશાવર્કર્સ વેતન વિના સેવા આપી રહી છે.

પાટણમાં આશા વર્કર્સએ નોંધાવ્યો વિરોધ

અન્ય જિલ્લામાં આશાવર્કર્સ દ્વારા સરકાર સામે વિરોધ પ્રદર્શન

વડોદરા : શહેરમાં કોરોના વાઇરસને ડામવા કાર્યકરતી આશાવર્કર બહેનોએ મહિલા શક્તિ સેનાના પ્રમુખ ચંદ્રિકાબેન સોલંકીની આગેવાનીમાં જિલ્લા કલેક્ટર કચેરી ખાતે 1 દિવસના વેતનના રૂપિયા 33.33 રુપિયાનો ચેક મુખ્યમંત્રી રાહત ફંડમાં જમા કરવી સરકાર દ્વારા યોગ્ય વેતન આપવામાં આવે તેમજ આશાવર્કર બહેનોનું શોષણ બંધ કરવામાં આવે તે માટે રજુઆત કરવા પહોંચી હતી.

આણંદઃ મોટી સંખ્યામાં ભેગા થયેલા આશા વર્કર બહેનો દ્વારા આણંદ જિલ્લા કલેક્ટરની કચેરી બહાર રેલી યોજી સૂત્રોચ્ચાર સાથે કલેકટર કચેરીએ પહોંચ્યા હતા. આશા વર્કર બહેનોએ આણંદ જિલ્લા કલેક્ટરને સંબોધીને આપેલા આવેદનપત્રમાં જિલ્લામાં કામ કરતી આશાવર્કર બહેનોને ન્યાય અપાવવા રજૂઆત કરવામાં આવી હતી. આ આવેદનપત્ર ફોજદારી શાખાના નાયબ ચીટનીશને આપવામાં આવ્યું હતું.

બનાસકાંઠાઃ આજે 8 માર્ચના રોજ સમગ્ર વિશ્વમાં ઉત્સાહપૂર્ણ માહોલમાં મહિલા દિવસની ઉજવણી થઈ રહી છે, જે હેઠળ બનાસકાંઠા જિલ્લામાં પણ અનેક સેવાભાવી સંસ્થાઓ અને જિલ્લા વહીવટીતંત્ર દ્વારા નારીશક્તિને સન્માનિત કરવાના અનેકવિધ કાર્યક્રમો યોજાયા હતા. જોકે, આશાવર્કર બહેનો હજુપણ પૂરતું વેતન માટે વલખાં મારવા મજબૂર છે, ત્યારે જિલ્લા કલેકટર કચેરી બહાર આશાવર્કર બહેનો અપૂરતા પગારના વિરોધમાં આવેદનપત્ર આપવા એકત્ર થઈ હતી. આશાવર્કર આગેવાન પિન્કીબેન પરમારે જણાવ્યું હતું કે, મહિલા સશક્તિકરણની મસમોટી વાતો કરવાને બદલે પહેલાં આશાવર્કર બહેનોને પૂરતો પગાર આપો, નહીંતર આવા દેખાડા બંધ કરવા જોઈએ.

સુરેન્દ્રનગર : ટાગોર બાગમાં જિલ્લાભરમાંથી આશાવર્કર બહેનો એકત્ર થઈ હતી. આશાવર્કર બહેનોને ગત છ મહિનાથી વેતન ચૂકવવામાં ન આવતા આશાવર્કર બહેનોમાં રોષની લાગણી ઊભી થઈ છે. ટાગોર બાગમાં બહેનોએ સૂત્રોચ્ચાર પોકારીને પ્રદર્શન કર્યું હતું.

વલસાડઃ જિલ્લાની આશાવર્કર મહિલાઓ દ્વારા પગાર અને અન્ય પડતર માંગણી મુદ્દે છેલ્લા કેટલાય વર્ષોથી લડત ચલાવવામાં આવી રહી છે, જેને લઈને આજ રોજ વલસાડના તડકેશ્વર મંદિરના પટાંગણમાં આશાવર્કરોની મિટિંગ નું આયોજન કરવામાં આવ્યું હતું, જેમાં આશાવર્કરોના આગેવાન ચંદ્રિકાબેન સોલંકી પણ ઉપસ્થિત રહ્યા હતા.

મહેસાણાઃ આશાવર્કરો અને ફેસિલિટરની પડતર માંગણીઓને લઈને મહેસાણા કલેકટરને આવેદનપત્ર આપવામાં આવ્યું હતું. જે દરમિયાન મહેસાણા જિલ્લાની મોટી સંખ્યામાં આશાવર્કરો અને ફેસિલિટેટર બહેનો ઉમટી પડી બિલાડી બાગથી કલેકટર કચેરી સુધી રેલી કાઢી હતી.

વડોદરાઃ છેલ્લા 9-9 મહિનાઓથી દેવદૂત બની પ્રજાને કોરોનાંના પ્રકોપથી બચાવવા સતત કામગીરી કરનારા આશાવર્કર અને ફેસિલિટેટર બહેનોના છેલ્લા ઘણા સમયથી પડતર પ્રશ્નોનું નિરાકરણ નહીં આવતા ગુજરાત જનતા જાગૃતિ મંચના નેજા હેઠળ મહિલા કર્મીઓએ રેલી યોજી હતી, સાવલી તાલુકા હેલ્થ ઓફિસરને આવેદનપત્ર આપી રજૂઆત કરી હતી.