ભણતરની સાથે ગણતર, બી.એમ શાળામાં જલ હૈ તો કલ હૈ વિષય પર પ્રદર્શન યોજાયું

પાટણ: જિલ્લામાં વિધાર્થીઓ પાયાના શિક્ષણની સાથે પાણીનું મૂલ્ય સમજી શકે તે માટે બી.એમ.પ્રાથમિક શાળા ખાતે 'જલ હૈ તો કલ હૈ' વિષય પર પોસ્ટર પ્રદર્શન યોજાયું હતું. આ પ્રદર્શન દ્રારા આપણા જીવનમાં પાણી કેટલુ મહત્વ ધરાવે છે. તે વિશે લોકોને સમજુતી કેળવે છે અને પાણી બચાવવા જાગૃત કરે છે.

આવનારા સમયમાં પાણીની વિકટ સમસ્યાને નિવારવા માટે રાજ્ય સરકાર દ્વારા આગોતરું આયોજન કરી જળ સંચય અભિયાન અંતર્ગત સમગ્ર રાજ્યમાં પાણીના સ્તર ઊંચા લાવવા માટે તળાવો નાળા ઊંડા કરી પાણી સંગ્રહની કામગીરી હાથ ધરી છે.

બાળકો પણ પાણીનું મૂલ્ય સમજી શકે અને બીજા લોકોને પાણીની કિંમત સમજાવી શકે તે માટે બુધવારે પાટણની બી.એમ.પ્રાથમિક શાળા ખાતે જળ સંચય અંતર્ગત પ્રદર્શન યોજાયું હતું. આ પ્રદર્શનમાં વિજ્ઞાન, ઇતિહાસ, ગણિત જેવા વિષયો પર પાણીને કેન્દ્રમાં રાખીને વિધાર્થીઓએ અલગ અલગ પોસ્ટરો રજૂ કર્યા હતાં. પ્રદર્શનમાં નદીઓ, સરોવર, તળાવ, વાવ, અને મહાસાગરોની સચિત્ર માહિતી વિધાર્થીઓએ રજૂ કરી હતી.શાળાના વિધાર્થીઓ અને વાલીઓએ આ પ્રદર્શન નિહાળ્યું હતું.