પાટણમાં 26 સોસાયટીઓએ ચૂંટણીનો કર્યો બહિષ્કાર

પાટણ શહેરના વોર્ડ નંબર 6 અને 7મા પ્રાથમિક સુવિધાઓ સહિતની સમસ્યાઓનો ઉકેલ ન આવતા 26થી વધુ સોસાયટીના રહીશોએ ચૂંટણીનો બહિષ્કાર કર્યો છે. સોસાયટીના સ્થાનિક રહીશોએ ગાંધીજીના અહિંસક આંદોલનની પેટન અપનાવી સોસાયટીના મુખ્ય પ્રવેશ દ્વાર પર બેસીને આંખો, મોઢું અને કાન બંધ કરીને મૂક વિરોધ નોંધાવ્યો હતો અને રાજકીય પક્ષોને એવો સંદેશો આપ્યો હતો કે, છેલ્લા ઘણાં વર્ષોથી આ વિસ્તારમાં નગરપાલિકાના સત્તાધીશો ના ઠાલા વચનોથી તેઓ કંટાળી ગયા છે, જેને લઈ ચૂંટણી માટે કોઈએ મત માગવા આવવુ નહીં.

• કર્મભૂમિ, રાજવી, ઉત્સવ, ત્રિભુવન પાર્ક સહિતની સોસાયટીના રહીશોએ ચૂંટણીનો કયો બહિષ્કાર
• રોડ રસ્તા, ગટર ઊભરાવાની સમસ્યાઓ દૂર ન થતાં કર્યો નિર્ણય
• સોસાયટીના રહીશોએ ત્રણ કપિરાજની નકલ કરી મુક વિરોધ નોંધાવ્યો

પાટણઃ નગરપાલિકાની ગત પાંચ વર્ષની ટર્મમાં અઢી વર્ષ કોંગ્રેસ અને અઢી વર્ષ ભાજપે શાસન કર્યું હોવા છતાં શહેરના મોટાભાગના વિસ્તારોમાં પ્રાથમિક સુવિધાઓનો અભાવ જોવા મળી રહ્યો છે. ખાસ કરીને પાટણ શહેરના જલારામ મંદિરથી લીલી વાડી તરફ જવાના માર્ગ ઉપર આવેલી કર્મભૂમિ, ઉત્સવ, ત્રિભુવન પાર્ક, શીશબંગલો, રાજવી બંગલો સહિતની 26 સોસાયટીઓ આવેલી છે અને આ માર્ગ ઉપરથી લોકોની અવરજવર પણ વધુ હોવા છતાં નગરપાલિકા તંત્ર દ્વારા આ વિસ્તારમાં દુર્લક્ષ સેવવામાં આવ્યું છે. આ વિસ્તારના રહીશોએ ઘણા સમયથી રખડતા પશુઓ, રોડ ઉપર ઉભરાતી ગટરો, વરસાદી પાણીનો ભરાવો અને સ્વચ્છતાને લઈ અનેકવાર સત્તાધીશોને રજૂઆતો કરવા છતાં તેનો કોઈ નિકાલ કરવામાં ન આવતાં આ વિસ્તારના લોકોએ ચૂંટણીનો બહિષ્કાર કર્યો છે. વિવિધ સોસાયટીના રહીશોએ ગાંધીજીના ત્રણ કપિરાજની નકલ કરી આંખ, મોઢું અને કાન બંધ કરી સત્તાધીશોના ઠાલા વચનોથી કંટાળી ગયા હોવાનુ જણાવી મુક વિરોધ કરી રાજકીય પાર્ટીઓનો અનોખી રીતે વિરોધ કર્યો હતો.

સોસાયટીના રહીશોએ ત્રણ કપિરાજની નકલ કરી મુક વિરોધ નોંધાવ્યો

દર ચોમાસામાં વિસ્તારના લોકોને ભોગવવી પડે છે હાલાકીઓ

સોસાયટીની મહિલાઓએ નગરપાલિકાના સત્તાધીશો સામે આક્રોશ વ્યક્ત કરી જણાવ્યું હતું કે, છેલ્લા 10 વર્ષથી આ વિસ્તારમાં દર ચોમાસાની સીઝન દરમિયાન વરસાદી પાણી ભરાઇ રહે છે, જેથી અવર-જવર માટે સ્થાનિકોને અનેક મુશ્કેલીઓનો સામનો કરવો પડે છે. સરકાર એકબાજુ સ્વચ્છતા અંગે અભિયાન ચલાવે છે, પણ આ વિસ્તારમાં સ્વચ્છતા પ્રત્યે કોઈ ધ્યાન આપવામાં આવતું નથી અને પ્રાથમિક સુવિધાઓ પુરી પાડવામાં આવતી નથી. માત્ર ચૂંટણી સમયે રાજકીય પક્ષોના આગેવાનો મત માંગવા આવે છે અને ત્યારબાદ કોઈ દેખાતું નથી માટે ચૂંટણીનો બહિષ્કાર કર્યો છે.

રોડ રસ્તા, ગટર ઊભરાવાની સમસ્યાઓ દૂર ન થતાં કર્યો નિર્ણય

બહિષ્કારના બેનરો લગાવતાં પાટણનું રાજકારણ ગરમાયું

પાટણમાં 26 સોસાયટીઓએ ચૂંટણીનો કર્યો બહિષ્કાર

પાટણ શહેરના ટેલિફોન એક્સચેન્જથી લીલી વાડી તરફ જવાના માર્ગ પર આવેલી 26 સોસાયટીના રહીશોએ સોસાયટીના ગેટ ઉપર ચૂંટણી બહિષ્કારના બેનરો લગાવતાં પાટણનું રાજકારણ ગરમાયું છે જેને લઇ ભાજપ કોંગ્રેસની ચિંતામાં વધારો થયો છે.