પાટણઃ જિલ્લામાં પરપ્રાંતમાંથી મજૂરીકામ અર્થે આવેલા શ્રમિકો લૉકડાઉનના પગલે જે-તે શહેર અને નગરોમાં અટવાયા હતા. તાજેતરમાં કેન્દ્ર સરકાર દ્વારા જે તે રાજ્યમાં અટવાયેલા પરપ્રાંતીયોને પોતાના વતન પરત મોકલવાની જાહેરાત કરવામાં આવી હતી. જેને પગલે પાટણ તાલુકાના 138 અને સરસ્વતી તાલુકાના 7 મળી કુલ 145 મધ્યપ્રદેશના શ્રમીકોએ વતન જવા વહીવટી તંત્ર પાસે મંજૂરી માંગી હતી.
આ સંદર્ભે સોમવારે બપોરના સમયે પાટણ મામલતદાર કચેરી ખાતે તમામ 145 પરપ્રાંતિય શ્રમિકોને એકઠા કરવામાં આવ્યા હતા અને પાંચ એસટી બસો દ્વારા મહેસાણા ખાતે લઈ જઈ ત્યાંથી મધ્યપ્રદેશ તરફ જનાર ટ્રેનમાં બેસાડી પોતાના વતન રવાના કર્યા હતા.
પાટણ મામલતદાર કચેરીના કર્મચારીઓ દ્વારા પહેલાં તમામ શ્રમિકો પાસેથી ભાડા પેટે રૂપિયા 510 ઉઘરાવવામાં આવ્યા હતા, પરંતુ સરકાર દ્વારા શ્રમિકોના ભાડા મામલે કરવામાં આવેલ અસ્પષ્ટ પરિપત્રને લઈ મૂંઝવણમાં મુકાયા હતા અને છેવટે શ્રમિકોને ભાડા પેટે ઉઘરાવેલા રૂપિયા 510 પરત આપ્યા હતા. જોકે આ બેવડી કામગીરીને કારણે કર્મચારીઓ અકળાયા હતા.