ભાજપના પૂર્વ સાંસદનો પૌત્ર દારૂ સાથે ઝડપાયો, પોલીસે 384 પેટી વિદેશી દારૂ સાથે દિવ્યરાજસિંહને ઝડપ્યો

આજકાલ દારૂની હેરાફેરીનું પ્રમાણ વધી રહ્યું છે, ત્યારે પંચમહાલમાં પણ આવો જ એક કિસ્સો બહાર આવ્યો છે. પંચમહાલમાં ખેતરમાં 407 ટેમ્પામાં ઇંગ્લીશ દારૂનો જથ્થો લાવીને કટિંગ કરી રહ્યા હતા. પોલીસને આ વાતની બાતમી મળતા પોલીસે શખ્સને પકડી પાડ્યો હતો અને બીજા શખ્સો નાસી છૂટ્યા હતા. આ કેસમાં પકડાયેલો શખ્સ પણ પંચમહાલના માજી સાંસદ પ્રભાતસિંહ ચૌહાણનો પૌત્ર અને ધારાસભ્ય સુમનબેન ચૌહાણનો ભત્રીજો હોવાનુ બહાર આવ્યું હતું.

• વેજલપુર પોલીસ સ્ટેશનનો સ્ટાફ શુક્રવારે રાત્રે નાઈટ પેટ્રોલિંગમાં હતો
• ટેમ્પામાં વેજલપુર પોલીસને 500 ML બીયરની 66 પેટી મળી આવી
• 384 પેટી વિદેશી દારૂ અને બિયરનો મુદ્દામાલ મળી આવ્યો
  

પંચમહાલ- વેજલપુર પોલીસ સ્ટેશનનો સ્ટાફ શુક્રવારે રાત્રે નાઈટ પેટ્રોલિંગમાં હતો, ત્યારે PSI આર.ડી.ચૌધરીને ખાનગી બાતમીદાર તરફથી ચોક્કસ બાતમી મળી હતી કે, દિવ્યરાજસિંહ ઉર્ફે રાજા ઉમેશસિંહ ચૌહાણ અને રમેશભાઇ ધનાભાઈ વણકર બન્ને ભેગા મળીને કાલોલ તાલુકાના ભાદરોલી ખુર્દ ગામમાં આવેલા ઈંટોના ભઠ્ઠા નજીક ભકાભાઇના ખેતરમાં 407 ટેમ્પામાં ઇંગ્લીશ દારૂનો જથ્થો લાવીને કટિંગ કરી રહ્યા છે. જે બાતમી આધારે PSI આર.ડી.ચૌધરી અને પોલીસ સ્ટાફ સાથે રાત્રિના સુમારે સરકારી અને ખાનગી વાહન સાથે રેડ કરતા એક ટેમ્પો ઉભો હતો અને એક શખ્સ ટેમ્પાની પાછળ ઊભો હતો.

આ પણ વાંચો- મદિરા અને તેના પાછળની માન્યતા, જાણો મદિરાપાનની વિવિધ અવસ્થાઓ અને લક્ષણો...

વિદેશી દારૂની પ્લાસ્ટિકની 180 MLની 303 પેટી મળી આવી

પોલીસે શખ્સને પકડીને નામ પુછતા દિવ્યરાજસિંહ ઉર્ફે રાજા ઉમેશ સિંહ ચૌહાણ હોવાનું જણાવ્યું હતું. પોલીસને જોઇને તેની સાથેનો રમેશભાઈ વણકર તથા ટેમ્પો ચાલક અને બીજા માણસો અંધારાનો લાભ લઇ નાસી છૂટયા હતા. સ્થળ પરથી ટેમ્પામાં વેજલપુર પોલીસને 500 ML બીયરની 66 પેટી મળી આવી હતી તથા ટેમ્પા નજીક ભોયતળિયેથી રોયલબ્લુ કંપનીની વિદેશી દારૂની પ્લાસ્ટિકની 180 MLની 303 પેટી મળી આવી હતી.

રૂપિયા 17,16,640નો મુદ્દામાલ વેજલપુર પોલીસે ઝડપી પાડયો

આ ઉપરાંત મેક ડોલ વિસ્કી 180 MLની કાચની બોટલવાળી 15 પેટી કુલ મળીને 384 પેટી વિદેશી દારૂ અને બિયરનો મુદ્દામાલ મળી આવ્યો હતો. જે કુલ મળીને 16,884 બોટલો જેની કિંમત રૂપિયા 14,66,640 તથા ટેમ્પો રૂપિયા 2,50,000 મળી રૂપિયા 17,16,640નો મુદ્દામાલ વેજલપુર પોલીસે ઝડપી પાડયો હતો.

આ પણ વાંચો-ખોલવડ ખાતે પોલીસે કરોડોના દારૂ પર બુલડોઝર ફેરવી નાશ કર્યો

નાસી છૂટેલા શખ્સ સામે પ્રોહી એક્ટ હેઠળ કાર્યવાહી હાથ ધરી છે

પોલીસે પકડેલા શખ્સને સાથે રાખી પૂછપરછ કરતા કઈ જણાવતો ન હતો. તેની પાસે આ દારૂ આ અંગે આધાર પુરાવો, પાસ પરમીટ માગતા કોઈ જાતની પાસ પરમીટ મળી આવી નહોતી. વેજલપુર પોલીસે પકડેલા તેમજ નાસી છૂટેલા શખ્સ સામે પ્રોહી એક્ટ હેઠળ કાર્યવાહી હાથ ધરી ગણનાપાત્ર કેસ નોંધી પકડાયેલો શખ્સ પણ પંચમહાલના માજી સાંસદ પ્રભાતસિંહ ચૌહાણનો પૌત્ર અને ધારાસભ્ય સુમનબેન ચૌહાણનો ભત્રીજો હોવાનુ બહાર આવતા સમગ્ર પંચમહાલ જીલ્લાના રાજકારણમા ભુકંપ સર્જાયો છે. વેજલપુર પોલીસે ઝડપેલા જથ્થાબંધ દારૂના જથ્થામાં પુનઃ પ્રભાતસિંહ ચૌહાણના કુટુંબનું નામ આવતાં રાજકીય ભૂકંપ સર્જાયો છે.